Hvernig fara menn að því að ríða baggamun?

Nafn þitt

Netfang þitt

Netfang móttakanda

Ruslpóstvörn =

Svar

Hvernig fara menn að því að ríða baggamun?
Orðasambandið að ríða baggamuninn er sótt til þess tíma þegar baggar voru fluttir á reiðingshestum. Baggamunur er þá sá munur sem er á stærð bagganna. Hann var óæskilegur, og reynt var að hafa baggana sem jafnasta. Ef munur var á þyngd þeirra héldu baggarnir illa jafnvægi, vildu síga til þeirra hliðar á hestinum þar sem þyngri bagginn var. Að ríða baggamuninn var það kallað þegar einhver var látinn sitja reiðingshest og halla sér til annarrar hliðar, þeirrar með léttari bagganum, til þess að baggarnir héldu æskilegu jafnvægi. Einnig mun hafa þekkst, ef enginn heppilegur reiðmaður var tiltækur, að eitthvað var hengt við léttari baggann til að jafna þyngslin.

Í yfirfærðri merkingu er sambandið notað um að eitthvað ráði úrslitum, til dæmis: „Nýr leikmaður kom inn á völlinn og reið það baggamuninn og liðið sigraði“. Í þessari merkingu er sambandið þekkt frá fyrri hluta 19. aldar. Frá sama tíma er annað afbrigði orðasambandsins, það er ríða af baggamuninn og nær það upphaflegu merkingunni öllu betur.

Frekara lesefni á Vísindavefnum:

• Hver er mælieiningin 'hestar' um hey? Eru það hestburðir? eftir Ulriku Andersson

Mynd:

• Úr bókinni Iceland for 1000 years eftir Daniel Bruun. Sótt 3.8.2010.

...