Í íslensku Biblíunni er orðið lögmál þýðing á hebreska orðinu torah, sem orðrétt þýðir fræðsla eða kenning. Í grísku þýðingu Biblíunnar eða Gamla testamentisins frá því á 3. öld f. Kr. er torah þýtt með orðinu nomos sem þýðir lög eða lögmál og þar af leiðandi er nomos notað í Nýja testamentinu. Þegar Biblían var þýdd á latínu var tora/nomos þýtt með orðinu lex, sem eins og nomos þýðir lög eða lögmál.

Í guðspjöllunum er víða vitnað í Gamla testamentið sem lögmálið og spámennina. Það styðst við gyðinglega venju en Gyðingar skipta Biblíunni í lögmálið (torah) og spámennina (stundum lögmálið, spámennina og ritin; sjá svar við spurningunniHvernig flokka Gyðingar rit Gamla testamentisins?). Þá á lögmálið (torah) við Mósebækurnar fimm.