Hárin á skíðum hnúfubaka og annarra skíðishvala gegna mikilvægu hlutverki í fæðunámi þeirra. Skíðin eru föst við efri kjálka dýranna og sú hlið skíðanna sem snýr inn að munnholi er alsett hárum. Hnúfubakurinn hefur 330 pör af skíðum. Þau eru um 60 cm á lengd og rúmir 30 cm á breidd þar sem þau eru breiðust.

Hér sést hnúfubakur gleypa sjó sem er fullur af átu.

Skíðishvalir gleypa gríðarlegt magn af sjó og geyma í munnholinu, síðan loka þeir munninum og þrýsta sjónum út á milli skíðanna. Hárin hjálpa þeim að halda eftir ýmsum smádýrum sem þeir sía úr sjónum. Þau sitja eftir í hárunum og hvalurinn gleypir þau síðan.

Skíði úr gráhval

Helsta fæða hnúfubaka er ljósáta, ýmsar árfætlur (copepoda) og smáir fiskar, þar á meðal loðna, síld, síli og makríll. Hnúfubakar þurfa að éta mikið til að viðhalda sér enda eru fullorðin dýr venjulega um 30 til 50 tonn að þyngd. Vísindamenn telja að á hverjum degi þurfi fullvaxnir hvalir að hesthúsa 2000 - 2500 kg af sviflægri fæðu. Yfirleitt hafa þeir samvinnu við veiðarnar.