Rafeindabyssa í myndlampa sjónvarpsins skýtur rafeindum á skjáinn og þar sem rafeindirnar lenda lýsist skjárinn upp og við sjáum ljós. Til þess að þetta gangi upp þarf skjárinn að vera húðaður að innan með efni sem hefur þann eiginleika að gefa frá sér ljós þegar rafeindir skella á því.

Til að fá svarthvíta mynd á skjáinn þarf einungis að stýra styrk rafeindageislans og þá fæst breytilegt ljósmagn á skjánum. Til þess að við sjáum litmynd þarf þrjár rafeindabyssur sem skjóta rafeindum á þrjá punkta sem hver geislar einum þriggja grunnlitanna (rauður, grænn, blár) í hverjum díl á skjánum.

Hægt er að fræðast meira um þetta í svari Hildar Guðmundsdóttur við spurningunni Hvernig verka myndlampar í sjónvörpum?