Sendu inn spurningu

Hér getur þú sent okkur nýjar spurningar um vísindaleg efni.

Hafðu spurninguna stutta og hnitmiðaða og sendu aðeins eina í einu. Einlægar og vandaðar spurningar um mikilvæg efni eru líklegastar til að kalla fram vönduð og greið svör. Ekki er víst að tími vinnist til að svara öllum spurningum.

Persónulegar upplýsingar um spyrjendur eru eingöngu notaðar í starfsemi vefsins, til dæmis til að svör verði við hæfi spyrjenda. Spurningum er ekki sinnt ef spyrjandi villir á sér heimildir eða segir ekki nægileg deili á sér.

Spurningum sem eru ekki á verksviði vefsins er eytt.

Að öðru leyti er hægt að spyrja Vísindavefinn um allt milli himins og jarðar!

=

Hvaða afmælisdag Jarðar var Ævar vísindamaður að tala um í þættinum sínum?

Upprunalega hljóðaði spurningin svona:
Hvenær varð Jörðin til og hvaða afmæli Jarðarinnar var þetta sem Ævar vísindamaður talaði um í þættinum sínum?

Jörðin varð til fyrir um það bil 4.500 milljónum ára en það er ekki hægt að tilgreina aldur hennar mikið nákvæmar en það. Jörðin á því engan afmælisdag, ekki frekar en flest í heiminum fyrir utan fólk. Hins vegar tíðkast það iðulega að velja einhvern ákveðinn dag og gera hann að eins konar „afmælisdegi“ hugmynda, hluta eða fyrirbæra, manngerðra eða í náttúrunni. Þannig mætti allt eins líta á Dag Jarðar sem afmælisdag Jarðarinnar.

Þann 22. apríl ár hvert er haldið upp á Dag Jarðar um allan heim, en dagurinn er tileinkaður náttúruvernd og fræðslu um umhverfismál. Upphafið má rekja til ársins 1970 þegar 20 milljónir manna um öll Bandaríkin sameinuðust um að vekja athygli á hnignandi ástandi náttúru og umhverfis. Skólar á öllum skólastigum tóku virkan þátt en þarna lögðust líka á eitt grasrótarhópar sem höfðu til dæmis barist gegn olíumengun, skolpmengun, losun spilliefna, notkun skordýraeiturs, mengun frá iðnaði og orkuverum, ágangi á búsvæði villtra dýra og svo framvegis.

Frá upphafi hafa skólar tekið virkan þátt í Degi Jarðar. Þessir nemendur í Oceanway Middle School í Bandaríkjunum fögnuðu Degi Jarðar árið 2010 með útikennslu.

Upphaflega var Dagur Jarðar bundinn við Bandaríkin en 20 árum síðar, árið 1990, hafði hugmyndin náð til annarra landa og 200 milljónir manna í 141 landi tóku þátt í hátíðahöldum þar sem sjónum var meðal annars beint að mikilvægi endurvinnslu. Áratug síðar voru um 5.000 umhverfisverndarsamtök í 183 löndum beinir þátttakendur í deginum sem náði til hundraða milljóna manna. Þá var áherslan meðal annars á hlýnun jarðar og hreina orku.

Árið 2009 gerðu Sameinuðu þjóðirnar 22. apríl að alþjóðlegum degi móður Jarðar. Á þessum degi árið 2016 undirrituðu 175 ríki Parísarsamkomulagið um viðnám gegn loftslagsbreytingum í höfuðstöðvum Sameinuðu þjóðanna.

Dagur Jarðar hefur ekki náð að festa sig almennilega í sessi hér á landi en er þó smám saman að fá meiri athygli. Árið 2017 á til að mynda að halda í vísindagöngu í tilefni dagsins. Um þann viðburð er hægt að lesa meira hér: Vísindaganga á Degi Jarðar í miðborg Reykjavíkur - Stöndum vörð um vísindin!

Heimildir og mynd:

Útgáfudagur

21.4.2017

Spyrjandi

Karen Lind Einarsdóttir

Höfundur

Tilvísun

EDS. „Hvaða afmælisdag Jarðar var Ævar vísindamaður að tala um í þættinum sínum?“ Vísindavefurinn, 21. apríl 2017. Sótt 20. júlí 2017. http://visindavefur.is/svar.php?id=66979.

EDS. (2017, 21. apríl). Hvaða afmælisdag Jarðar var Ævar vísindamaður að tala um í þættinum sínum? Vísindavefurinn. Sótt af http://visindavefur.is/svar.php?id=66979

EDS. „Hvaða afmælisdag Jarðar var Ævar vísindamaður að tala um í þættinum sínum?“ Vísindavefurinn. 21. apr. 2017. Vefsíða. 20. júl. 2017. <http://visindavefur.is/svar.php?id=66979>.

Chicago | APA | MLA

Sendu inn spurningu
eða

Vísindadagatalið

Rósettusteinninn

Hermenn Napóleons Bónapartes fundu Rósettusteininn í júlí 1799, nálægt egypsku borginni Rosetta sem í dag ber nafnið Rashid. Á steininn er sami texti letraður á þremur mismunandi ritmálum: fornegypsku myndletri eða híeróglýfum, yngra egypsku letri og loks grísku. Steinninn gerði mönnum kleift að ráða egypska myndletrið. Rósettusteinninn er til sýnis í Breska safninu í London.