Deyr loðna eftir hrygningu eins og á við um laxinn?

Nafn þitt

Netfang þitt

Netfang móttakanda

Ruslpóstvörn =

Svar

Deyr loðna eftir hrygningu eins og á við um laxinn?
Já það er rétt að nær öll loðna drepst að hrygningu lokinni.

Helstu hrygningarsvæði loðnunnar hér við land eru með suður- og vesturströndinni, allt frá Hornafirði að Ísafjarðardjúpi. Hrygningin hefst í febrúar og stendur fram í apríl og maí en dæmi er um hrygningu hjá loðnunni eitthvað inn í sumarmánuðina. Loðnan hrygnir eggjum sínum á sjávarbotninn og límast smá rauðgul eggin, sem eru um 1 mm í þvermál, við steina og kletta. Talið er að hrygnan gjóti á bilinu 30–40 þúsund eggjum allt frá fjöruborði og niður á 70-80 metra dýpi. Mikið dregur af henni við hrygningu og talið er að hún hrygni aðeins einu sinni á ævi sinni. Þó er ekki alveg útilokað að einhverjar hrygnur geta hrygnt tvisvar. Á hrygningatímanum geta hængarnir tekið þátt í fleiri en einum hrygningadansi og fróvgað egg fleiri en einnar hrygnu en þetta tekur á karlinn og talið er að hrygningadauði hænganna sé alger.

Koma loðnunnar er gósentíð fyrir lífríkið umhverfis landið og mikilvæg fyrir vistkerfið. Segja má að hún komi orku frumframleiðslunnar yfir á næstu fæðuþrep þegar hún kemur feit og pattaraleg til hrygningargöngu af hafsvæðunum norðan Íslands. Á ætisstöðvum étur hún aðallega smáar krabbaflær svo sem rauðátu en einnig ljósátu, marflær, fiskegg og pílorma, en verður svo sjálf að æti fyrir mikilvæga nytjastofna en einnig hvali og fugla, sem herja á hana þegar hún fer vestur með suðurströnd landsins til að hrygna. Þá eru loðnueggin fæða fyrir þorska og aðra bolfiska og dauðar loðnur á sjávarbotninum og þar sem þær rekur í fjörur eru mikilvæg fæða fugla og botnlægra hrææta.

Heimildir og mynd:

• Hjálmar Vilhjálmsson. (1998). Lífríki sjávar. Loðna. Reykjavík, Námsgagnastofnun og Hafrannsóknastofnunin.
• Karl Gunnarsson, Gunnar Jónsson og Ólafur Karvel Pálsson. (1998). Sjávarnytjar við Ísland. Reykjavík, Mál og menning.
• Mynd: Caplin (Mallotus villosus) discovered by Tclenche - Sightings of Newfoundland and Labrador. Höfundur myndar: Thomas Clenche. Birt með góðfúslegu leyfi. (Sótt 8.4.2021).

...