Hvernig verndar æðarfugl eggin sín?

Nafn þitt

Netfang þitt

Netfang móttakanda

Ruslpóstvörn =

Svar

Hvernig verndar æðarfugl eggin sín?
Eins og flestir aðrir fuglar, þarf æðarfuglinn bæði að verja egg sín gegn kulda og fyrir afræningnum.

Til þess að halda eggjunum heitum og verja þau og vernda fyrir kulda þá plokkar æðarkollan (Somateria mollissima) dún af bringunni og hylur eggin með honum. Æðardúnn er frábært efni til þess að einangra og með því helst hitinn á eggjunum á meðan kollan fer út á sjó að finna sér æti. Með dúninum getur hún líka hulið eggin og falið þau að einhverju leyti fyrir afræningjum svo sem hröfnum, máfum og tófum.

Val á hreiðurstæði getur líka verið vörn gegn afræningjum en æðarfuglar velja oft hreiðurstæði sem dylja hreiðrin vel, svo sem á milli stórra grjóthnullunga eða við þá, í háu grasi eða úti í hólmum. Auðvelt er að laða æðarfugl að bæjum og oft eru þar þétt æðarvörp. Þar fær fuglinn vernd fyrir afræningjum frá bændum sem njóta góðs af samlífinu með æðarfuglinum með því að nýta dúninn sem er afar verðmætur.

Æðarkollan hætti sér sjaldan langt frá hreiðrinu og fer venjulega aðeins einu sinni á dag út á sjó að leita sér að æti. Hún er því afar þaulsetin á hreiðrinu og getur verið hreyfingalaus þegar komið er að hreiðri en rokið svo skyndilega burt af hreiðrinu og þóst vera slösuð, til dæmis dregið vænginn eftir jörðinni til að beina athygli afræningjans frá hreiðrinu. Slíkt atferli er mjög algengt, meðal annars hjá mófuglum svo sem heiðlóu og einnig sandlóu.

Myndir:

• Yfirlitsmynd: Paul Gierszewski. (2014, 14. júlí). Eider nest.jpg. Wikimedia Commons. https://commons.wikimedia.org/wiki/File:Eider_nest.jpg
• Needpix.com. https://www.needpix.com/photo/851909/

...