Af hverju fóru múslimar í landvinninga á Íberíuskaga á 8. öld og hverjir réðu þá ríkjum á skaganum?

Nafn þitt

Netfang þitt

Netfang móttakanda

Ruslpóstvörn =

Svar

Af hverju fóru múslimar í landvinninga á Íberíuskaga á 8. öld og hverjir réðu þá ríkjum á skaganum?
Hér er einnig að finna svar við spurningunni:

Hverjir réðu ríkjum á Íberíuskaga þegar múslimar hófu þar landvinninga á 8. öld?

Ekki er vitað með vissu hvers vegna múslimar lögðu í landvinninga yfir sundið frá marokkósku hafnarborginni Ceuta til suðurodda Spánar árið 711. Á þessum tíma réð germönsk þjóð, Vestgotar, ríkjum á Íberíuskaga. Þeir höfðu numið land á fimmtu öld í kjölfar útbreiðslu annarra germanskra þjóðflokka, þar á meðal Vandala^[1] sem á tímabili komu sér upp ríki í Norður-Afríku á árunum 435 til 534. Það er mögulegt að múslimar hafi fengið veður af veikleikum í ríki Vestgota þegar þeir ákváðu að láta til skarar skríða, en þess utan er strandhögg þeirra á Íberíuskaga beint framhald af landvinningum þeirra í Norður Afríku á sjöundu öld og öndverðri áttundu öld.

Vestgotar höfðu lengi verið fyrirferðarmiklir í Evrópu og voru Rómverjum til mikils ama. Engu að síður tóku þeir upp marga rómverska siði og lög. Í veldi sínu á Íberíuskaga iðkuðu þeir framan af aríska kristni^[2] en snerust árið 589 til kaþólsku. Á 6. öld höfðu Vestgotar komið upp nokkuð stöðugu stjórnarfari á Spáni, en þó virðist sem Íberíuskagi hafi verið fremur strjálbýll á þessum tíma. Mögulega áttu plágurnar sem fóru um alla Evrópu um miðja 6. öld hlut að máli, en yfirleitt virðist sem bæir og borgir Vestgota hafi verið einfaldari í sniðum en tíðkast hafði þegar Rómverjar réðu Íberíuskaga, og hinir miklu landkostir hans voru illa nýttir eða alls ekki.^[3]

Fornleifar frá tímum Vestgota bera þó merki um glæsta menningu og áhugaverðan samruna rómverskra, kristinna og germanskra hefða. Þetta má sjá í byggingarlist þeirra, svo sem í kirkjum og kastölum, þar sem rómversk áhrif renna saman við germanska hönnun. Lagabálkar þeirra, einkum Liber Judiciorum, endurspegluðu samruna rómverskra laga og germanskra siða. Rómversk áhrif þýddu að latína var ríkjandi bókmenntamál, og þó að Vestgotar hafi einbeitt sér meira að laga- og trúartextum veita bókmenntir þeirra innsýn í menningarlegar og trúarlegar breytingar tímabilsins. Í trúarbókmenntum eru ritverk biskupa og guðfræðinga á borð við Ísidór frá Sevilla sérstaklega athyglisverð. Alfræðiriti hans Etymologiae Isidore var ætlað að safna saman fróðleik frá hinum forna heimi og það gegndi mikilvægu hlutverki við varðveislu klassískrar þekkingar á fyrri hluta miðalda.

Vestgotar skrifuðu einnig helgisiðatexta og dýrlingasögur sem endurspegla vaxandi mikilvægi kristninnar á þessu tímabili. Enn fremur hafa ýmsir merkilegir gripir frá þeirra tíð fundist á Spáni og má helst nefna fjársjóð frá 7. öld sem grafinn var upp í Guarrazar nærri Toledo. Þar eru glæsilegar kórónur og skartgripir úr gulli og gimsteinum sem bera vitni um þróað handverk og fagurfræði Vestgota.

Tilvísanir:

1. ^ Orðið Al-Andalus er líklega dregið af því heiti.
2. ^ Kennd við Aríus frá Alexandríu sem var kristinn guðfræðingur á 3. og 4. öld. Hann setti fram kenningar sem höfnuðu þrenningarkenningunni sem gekk út á að sætta guðlegt eðli Jesú við grunnsetningu eingyðistrúar. Margar germanskar þjóðir tóku þessa tegund kristni á öndverðum miðöldum.
3. ^ H. Kennedy, Muslim Spain and Portugal, bls. 2-3.

Mynd:

• Yfirlitsmynd: Visigothic Kingdom - Wikipedia. (Sótt 28.09.2026). Hluti af málverki eftir Fabrizio Castello (1560-1617) af Þjóðreki I.

...