Er hægt að eignast eineggja þríbura eða meira?

Svar

Já, það hafa fæðst eineggja þríburar og jafnvel eineggja fjórburar og fimmburar, en slíkt er afar sjaldgæft.

Þríburar geta ýmist verið eineggja, tvíeggja eða þríeggja. Þegar frjóvgað egg klofnar í tvennt verða til eineggja tvíburar en ef önnur dótturfruman klofnar svo aftur í tvennt verða til eineggja þríburar. Ef frumurnar klofna oftar verða til fleiri fósturvísar, allir komnir af sömu okfrumu og því allir með nákvæmlega eins erfðaefni.

Eineggja þríburar, eins og þessar stúlkur, eru afar sjaldgæfir.

Tvíeggja þríburar verða til þegar tvö frjóvguð egg eru samtímis í legi móður og annað þeirra klofnar í tvennt. Þá eru tveir þríburana með eins erfðaefni en hinn þriðji er öðruvísi. Þríeggja þríburar verða til þegar kona losar þrjú egg við egglos og öll eggin þrjú eru frjóvguð af þremur mismunandi sáðfrumum, eða ef þrír fósturvísar sem komið hefur verið fyrir við tæknifrjóvgun ná að þroskast. Þá eru allir þrír með mismunandi erfðaefni.

Fæðingar eineggja þríbura eru það sjaldgæfar að það þykir jafnan fréttnæmt þegar þær eiga sér stað. Ef leitarorðin identical triplets eru slegin inn í leitarvél á veraldarvefnum má finna frásagnir ýmissa fréttamiðla af fæðingum slíkra barna.

Mynd

• Multiple Births - Wikipedia, the free encyclopedia. (Sótt 3.7.2012).