Hvernig fáum við rafmagn á Íslandi?

Nafn þitt

Netfang þitt

Netfang móttakanda

Ruslpóstvörn =

Svar

Hvernig fáum við rafmagn á Íslandi?
Það rafmagn sem notað er á Íslandi er nánast allt framleitt úr endurnýjanlegum orkugjöfum ólíkt því sem gerist hjá mjög mörgum öðrum þjóðum sem fá meirihluta raforku sinnar úr brennanlegu eldsneyti.

Rafvæðing Íslands hófst í byrjun 20. aldar þegar menn fóru að virkja bæjarlæki og önnur slík fallvötn. Það var svo undir lok 7. áratugar 20. aldarinnar sem farið var að nota jarðvarma til raforkuframleiðslu, en áður var byrjað að nota hann til húshitunar.

Á vef Orkustofnunar er ýmislegt forvitnilegt að finna, meðal annars tölur um heildarraforkuvinnslu allra stærstu virkjana landsins flokkaðar eftir tegund vinnslu. Gögnin ná aftur til annars áratugar síðustu aldar. Þar kemur skýrt fram að langstærsti hluti íslenskrar raforku á uppruna sinn í vatnsorku en nýting jarðvarma til raforkuvinnslu hefur þó farið vaxandi undanfarin ár og áratugi eins og glöggt má sjá í töflunni hér fyrir neðan.

Ár	Vatnsafl		Jarðhiti		Eldsneyti		Heild
	gWh	hlutfall [%]	gWh	hlutfall [%]	gWh	hlutfall [%]	gWh
2011	12507	72,7	4701	27,3	2	0,0001	17210
2001	6574	81,9	1451	18,1	3,3	0,041	8028,3
1991	4154	93,8	267	6,0	6	0,14	4427
1981	3085	94,7	123	3,8	50,3	1,44	3258,3
1971	1540	91,2	12	0,75	40,2	2,53	1592,2

Það er áhugavert að skoða hvað verður um það rafmagn sem framleitt er á Íslandi. Samkvæmt upplýsingum frá Orkustofnun fer langmest til stóriðju en lítill hluti fer í aðra atvinnustarfsemi og til heimila. Enda skýrist sá mikli vöxtur sem orðið hefur í raforkuframleiðslu á síðastliðnum áratug að mestu leyti af aukinni eftirspurn eftir orku til stóriðju.

Heimildir og graf:

• Orkumál - Raforka. 8. árg. 1.tbl. júlí 2012. (Skoðað 11. 12. 2012).
• Raforkuvinnsla á Íslandi | Raforkuvinnsla | Orkutölur | Orkustofnun | Orkustofnun. (Skoðað 11. 12. 2012).
• Raforka | Orkustofnun. (Skoðað 11. 12. 2012).
• Þorsteinn Vilhjálmsson. „Orkumenning og orkusaga“. Vísindavefurinn 13.10.2001. (Skoðað 11.12.2012).

...