Hér er nokkur vandi á höndum því að skammstöfunin DAFO er notuð yfir nokkur fyrirbrigði og ekki augljóst til hvers verið er að vísa með þessari spurningu. Hér verður þó gerð grein fyrir notkun hugtaksins DAFO-greiningar innan viðskiptafræði.

Á spænsku stendur skammstöfunin DAFO fyrir „debilidades, amenazas, fortalezas y oportunidades“ sem er kallað á ensku „strengths, weaknesses, opportunities and threats“ (SWOT) og á íslensku „styrkleikar, veikleikar, ógnanir og tækifæri“ (svót). Spænska skammstöfunin er ekki notuð á íslensku.

Svót-greining er afar einfalt tæki sem oft er beitt á fyrirtæki. Greiningin felst í því að kortleggja hverjir eru helstu styrkleikar fyrirtækisins, hverjir veikleikarnir, hvaða ógnanir steðja að því og hvaða sóknarfæri það hefur. Í sinni einföldustu mynd felst greiningin í því að búa til lista með þessum fjórum þáttum fyrir tiltekið fyrirtæki. Hægt er að beita svót-greiningu á fleira en fyrirtæki, til dæmis landsvæði, tungumál, stýrikerfi tölva og svo mætti lengi telja.

Sama skammstöfun, DAFO, er líka notuð fyrir ýmis önnur fyrirbrigði á ensku og sjálfsagt enn fleiri á öðrum tungumálum, svo sem „district agriculture forestry office“, „dynamic ankle-foot orthoses“ og „dried agarose film overlay“ en hér verður ekkert fjallað um þau fyrirbrigði.

Frekara lesefni á Vísindavefnum:

• Hvað er ABC-greining? eftir Gylfa Magnússon