Sendu inn spurningu

Hér getur þú sent okkur nýjar spurningar um vísindaleg efni.

Hafðu spurninguna stutta og hnitmiðaða og sendu aðeins eina í einu. Einlægar og vandaðar spurningar um mikilvæg efni eru líklegastar til að kalla fram vönduð og greið svör. Ekki er víst að tími vinnist til að svara öllum spurningum.

Persónulegar upplýsingar um spyrjendur eru eingöngu notaðar í starfsemi vefsins, til dæmis til að svör verði við hæfi spyrjenda. Spurningum er ekki sinnt ef spyrjandi villir á sér heimildir eða segir ekki nægileg deili á sér.

Spurningum sem eru ekki á verksviði vefsins er eytt.

Að öðru leyti er hægt að spyrja Vísindavefinn um allt milli himins og jarðar!

=

Hefur einhver siglt inn í Bermúdaþríhyrninginn og komið þaðan heill á húfi aftur?

Hinn svokallaði Bermúdaþríhyrningur er svæði á Norður-Atlantshafi sem hægt er að afmarka með þríhyrningi sem dreginn er frá Miami í Flórída til Bermúda-eyja og þaðan til Púertó Ríkó. Reyndar eru heimildir ekki allar sammála um hvar mörk svæðisins liggja nákvæmlega, það er stundum talið vera stærra, en þetta er það svæði sem algengast er að gangi undir heitinu Bermúdaþríhyrningurinn.



Frægð Bermúdaþríhyrningsins byggist á því að þar hafa mörg farartæki, bæði skip og flugvélar farist, oft án vísbendinga um afdrif þeirra. Ýmsar skýringar hafa verið settar fram um þessi hvörf og þá stundum tengdar einhverjum yfirnáttúrlegum atburðum eða kröftum. Jarðbundnari skýringar gera hins vegar ráð fyrir að það sé náttúran sjálf eða mannleg mistök sem eiga sök að máli. Nánar er fjallað um það í svari við spurningunni Hvað er Bermúdaþríhyrningurinn?

Það er langt því frá að öll skip sem sigla inn í Bermúdaþríhyrninginn hverfi og komi aldrei aftur. Í rauninni er mjög mikil umferð skipa á þessu svæði, flutningaskip á leið til hafna í Evrópu, Ameríku eða á Karíbahafseyjum, auk skemmtiferðaskipa og minni báta. Einnig er töluverð flugumferð yfir svæðið, vélar á leiðinni milli Norður- og Suður-Ameríku eða til eyja í Karíbahafinu.

Miðað við þann fjölda farartækja sem fer um Bermúdaþríhyrninginn á degi hverjum hefur verið bent á að tíðni slysa þar sem skip eða flugvélar farast, sé ekki hlutfallslega meiri á þessu svæði en mörgum öðrum. Vísindavefnum tókst þó ekki að hafa upp á tölum til að sannreyna það, en hitt er víst að langflest þau farartæki sem fara um Bermúdaþríhyrninginn, hvort sem er á sjó eða í lofti, skila sér á áfangastað án nokkurra vandræða.

Heimildir og mynd:

Útgáfudagur

27.10.2009

Spyrjandi

Álfrún Agnarsdóttir, f. 1998

Höfundur

Tilvísun

EDS. „Hefur einhver siglt inn í Bermúdaþríhyrninginn og komið þaðan heill á húfi aftur?“ Vísindavefurinn, 27. október 2009. Sótt 16. janúar 2019. http://visindavefur.is/svar.php?id=53760.

EDS. (2009, 27. október). Hefur einhver siglt inn í Bermúdaþríhyrninginn og komið þaðan heill á húfi aftur? Vísindavefurinn. Sótt af http://visindavefur.is/svar.php?id=53760

EDS. „Hefur einhver siglt inn í Bermúdaþríhyrninginn og komið þaðan heill á húfi aftur?“ Vísindavefurinn. 27. okt. 2009. Vefsíða. 16. jan. 2019. <http://visindavefur.is/svar.php?id=53760>.

Chicago | APA | MLA

Sendu inn spurningu
eða

Vísindadagatalið

Sigríður Þorgeirsdóttir

1958

Sigríður Þorgeirsdóttir er prófessor í heimspeki við Háskóla Íslands og er hún fyrst kvenna til að gegna fastri stöðu í heimspeki við skólann. Rannsóknir Sigríðar hafa beinst að því að draga fram fjölbreyttan mannskilning innan heimspekinnar með tilliti til þess að viðhorf hefðbundinnar heimspeki hefur lengst af verið karlhverft.