Til hvers er rófubeinið?

Nafn þitt

Netfang þitt

Netfang móttakanda

Ruslpóstvörn =

Svar

Til hvers er rófubeinið?
Rófubeinið er gert úr 3-5 neðstu hryggjarliðunum í rófulausum prímötum sem runnið hafa saman. Þessir liðir eru fyrir neðan spjaldhrygginn og tengjast honum um trefjabrjósklið, sem gerir svolitla hreyfingu milli spjaldhryggs og rófubeins mögulega.

Í mönnum og öðrum rófulausum prímötum er rófubeinið leifar af rófu sem forfeður okkar voru með. Rófubeinið er þó ekki alveg gagnslaust eins og halda mætti. Það veitir nauðsynlegt hald fyrir ýmsa vöðva, sinar og liðbönd. Einnig er það hluti af þungaberandi þrífótabyggingu sem veitir stoð í sitjandi stellingu. Rófubeinið tekur einkum á sig þunga þegar maður hallar sér aftur sitjandi en setbeinin þegar við höllum okkur fram.

Vöðvar sem eru mikilvægir fyrir starfsemi mjaðmagrindarbotns festast við rófubeinið að framan. Þetta eru vöðvar sem koma við sögu þegar við höfum hægðir og þvaglát og eru mikilvægir fyrir stöðu endaþarmsopsins. Stóri rassvöðvinn festist við rófubeinið aftanvert og réttir læri við göngu. Mikilvæg liðbönd tengjast rófubeininu og liggja meðfram hryggnum.

Rófubeinið er lítið en getur valdið töluverðum sársauka ef eitthvað fer þar úrskeiðis. Sársauki frá rófubeini kemur helst eftir fall á rassinn eða fæðingu og er því algengari meðal kvenna en karla. Einnig er möguleiki á æxlisvexti í rófubeininu og þá þarf á skurðaðgerð eða lyfjameðferð til að meðhöndla það. Í einstaka tilfellum þarf að fjarlægja rófubeinið ef ekki er hægt að meðhöndla kvilla sem þar eiga upptök sín á annan hátt.

Heimildir og mynd:

• Coccyx - Wikipedia, the free encyclopedia. (Skoðað 19.10. 2012).
• Tailbone (Coccyx) Injury: Causes, Symptoms, and Treatments. (Skoðað 19.10. 2012).
• Mynd: Pain | Andrea Wilson Woods' Blog. Íslenskur texti settur inn af ritstjórn Vísindavefsins. (Sótt 19.10. 2012).

Hér er einnig svarað spurningunum:

• Hvers vegna erum við með rófubein og hvaða tilgangi þjónar það?
• Er hægt að lifa án rófubeins?

...