Hvernig er best að ná grasgrænu úr fötum?

Nafn þitt

Netfang þitt

Netfang móttakanda

Ruslpóstvörn =

Svar

Hvernig er best að ná grasgrænu úr fötum?
Það er bagalegt að fá fitubletti í uppáhaldsflíkina sína, sulla rauðvíni eða appelsíni í borðdúkinn frá ömmu, koma að litla tveggja ára krílinu sem búið er að maka sultu og súkkulaði yfir sparikjólinn eða grípa átta ára guttann með grasgræn hné á nýju íþróttabuxunum. Þá er gott að vita af því að á vef Leiðbeiningastöðvar heimilanna er að finna leiðbeiningar og gagnleg ráð við ýmsu sem upp kann að koma í heimilishaldi. Þar með talið hvernig hægt er að vinna á ýmiss konar blettum. Það sem hér fer á eftir er byggt á ráðleggingum Leiðbeiningastöðvarinnar.

Áður en hafist er handa við blettahreinsun ætti alltaf að skoða vel meðferðarmerkingar á fatnaði þar sem sum efni og litir þola ekki þvott. Í þeim tilfellum er best að fara með flíkina í efnalaug. Einnig má hafa í huga að efnalaugar hafa yfir að ráða hreinsiefnum sem geta náð þrálátum blettum úr fatnaði og þar hefur starfsfólk þekkingu og reynslu á þessu sviði.

Almennt gildir að það ætti að reyna sem allra fyrst, og helst strax, að ná blettum úr fatnaði eða öðru því sem hefur blettast. Ef blettur situr of lengi getur efnið drukkið hann í sig og hann þornað inn í efnið með þeim afleiðingum að erfiðara verður að ná honum úr og jafnvel ógerlegt. Í mörgum tilfellum dugar að bera blettaeyði eins og finna má í þvottaefnishillum verslana á óhreina flötinn og þvo síðan á hefðbundinn hátt. Sumir blettir þurfa hins vegar sérmeðhöndlun.

Hér var sérstaklega spurt um grasgrænu. Í þeim tilfellum bendir Leiðbeiningastöðin á að það geti virkað vel að bera uppþvottalög eða grænsápu á blettinn og láta liggja í góðan tíma. Sítrónusafi eða annað bleikiefni getur dugað vel á grasgrænu í hvítu efni og einnig getur verið gott að hella mjólk á blettina og nudda síðan uppþvottalegi í. Síðan þarf að skola flíkina vel og þvo á venjulegan hátt.

Það er full ástæða til þess að kynna sér þennan gagnlega vef Leiðbeiningastövarinnar því þar er mikinn fróðleik að finna. Og ef ekki gengur að finna upplýsingarnar sem vantar er hægt að senda þeim tölvupóst eða hringja.

Heimild og mynd:

• Leiðbeiningastöð heimilanna - þvottaleiðbeiningar, blettir. (Skoðað 31.8.2012).
• Mynd: How To Remove Grass Stains - KidSport. (Sótt 31.8.2012).

...