Er nóg að geyma farangur úti í kulda og frosti yfir nótt og þvo beint upp úr töskunum til að losna við silfurskottur sem gætu hafa fylgt manni frá útlöndum?

Nafn þitt

Netfang þitt

Netfang móttakanda

Ruslpóstvörn =

Svar

Er nóg að geyma farangur úti í kulda og frosti yfir nótt og þvo beint upp úr töskunum til að losna við silfurskottur sem gætu hafa fylgt manni frá útlöndum?
Silfurskottur (Lepisma saccharina) sækjast eftir dimmu, röku og hlýju umhverfi en kunna illa við sig utandyra. Algengast er að þær verpi í glufum og sprungum, og dimmum og rökum skotum í húsnæðinu. Nýklakið ungviði og ungviði á fyrstu stigum getur þó þvælst víða og berst auðveldlega í fatnað. Þannig geta menn borið skordýrin með sér á milli staða. Töskur og skór geta líka borið með sér egg og smáar silfurskottur. Ef grunur leikur á að silfurskottur hafi tekið sér far með ferðalöngum þá ætti því ekki eingöngu að huga að fatnaði heldur einnig að hreinsa töskur og fótabúnað.

Silfurskottur og egg þeirra ættu ekki að lifa af þvott þannig að með því að setja fatnað strax í þvottavél er verulega dregið úr hættu á að „ferðasilfurskottur“ taki sér bólfestu á nýjum stað. Hins vegar er útikæling yfir nótt líklega ekki örugg aðferð til að hreinsa fatnað eða aðra hluti af silfurskottum, nema kuldinn sé þeim mun meiri. Vægur kuldi getur hægt á efnaskiptahraða skordýra en ræður ekki endilega niðurlögum þeirra.

Ef fólk vill nota kæliaðferðina þá ætti frekar að setja hlutinn sem um ræðir, hvort sem það er fatnaður eða annað, í frysti heldur en að treysta á næturfrostið. Víða í netheimum er mælt með þessari aðferð ef talin er hætta á að silfurskottur hafi verið að gæða sér á bókum eða blöðum, enda eru bækur ekki settar í þvottavélina með góðum árangri. Mælt er með því að hluturinn sé hafður í frosti í nokkra sólahringa til þess að tryggja árangur.

Rétt er að geta þess að mönnum stafar ekki hætta af silfurskottum en fáir sækjast þó eftir sambýli við þær.

Mynd:

• Silverfish (Lepisma saccharina) and Firebrat (Thermobia domestica) - Michigan State University Diagnostic Services. (Sótt 26. 2. 2013).

---

Upprunalega hljóðaði spurningin svona:

Þegar maður kemur frá útlöndum er þá nóg að geyma farangurinn úti yfir nótt, til dæmis í frosti og þvo svo þvottinn beint upp úr töskunum til að losna við silfurskottur sem hugsanlega hafa fylgt manni erlendis frá?

...