Hvað hefur vísindamaðurinn Helga Gottfreðsdóttir rannsakað?

Nafn þitt

Netfang þitt

Netfang móttakanda

Ruslpóstvörn =

Svar

Hvað hefur vísindamaðurinn Helga Gottfreðsdóttir rannsakað?
Helga Gottfreðsdóttir er prófessor í ljósmóðurfræði við Hjúkrunarfræðideild Háskóla Íslands og forstöðumaður fræðasviðs í ljósmóðurfræði við Kvenna- og barnasviðs á Landspítala. Helga er fyrsti prófessor í ljósmóðurfræði hér á landi. Í rannsóknum sínum hefur hún einkum fengist við efni sem tengjast meðgönguvernd.

Rannsóknir Helgu hafa meðal annars snúist um fósturskimanir, upplýsingagjöf og ákvarðanatöku verðandi foreldra. Jafnframt hefur hún skoðað þekkingu fagfólks á fósturskimun og reynslu kvenna af því að fá afbrigðilega niðurstöðu úr skimprófi á meðgöngu. Hagnýting þessara rannsókna felst í því að bæta upplýsingar varðandi þetta viðkvæma efni. Helga hefur tekið þátt í samstarfi við erlenda rannsóknahópa en fyrsta skrefið í einu slíku verkefni felst í því að skoða klíniskar leiðbeiningar um meðgönguvernd í 30 Evrópulöndum með áherslu á ýmis próf og mælingar og hvenær á meðgöngu slík próf eru gerð.

Töluverð umræða hefur átt sér stað síðustu ár hvernig hægt sé að undirbúa konur og verðandi foreldra sem best fyrir fæðingu. Í því sambandi hefur Helga kynnt sér sögu foreldrafræðslu hér á landi og erlendis og kannað reynslu verðandi foreldra af sérstökum undirbúningsnámskeiðum fyrir fæðingu. Nýjustu verkefnin á þessu sviði tengjast breyttum áherslum í meðgönguvernd með það að leiðarljósi að styðja við eðlilegt ferli meðgöngu og fæðingar.

Helga er fædd 1960. Hún lauk stúdentsprófi frá Flensborgarskólanum í Hafnarfirði 1980, BS-prófi í hjúkrunarfræði frá Háskóla Íslands 1984 og prófi frá Ljósmæðraskóla Íslands 1991. Hún lauk meistaranámi við Thames Valley-háskólann (nú Háskólinn í West London) 1999 og doktorsprófi í ljósmóðurfræði frá Háskóla Íslands 2009.

Helga vann í allmörg ár við almenn ljósmóðurstörf, aðallega meðgönguvernd og fæðingahjálp, en samhliða klínísku starfi varð hún stundakennari og síðan lektor við námsbraut í ljósmóðurfræði. Hún hefur tekið virkan þátt í umræðu um rannsóknarviðfangsefni sín og birt efni á innlendum og erlendum vettvangi með samstarfsfólki sínu og nemendum.

Mynd:

• © Kristinn Ingvarsson.

...