Hvað hefur vísindamaðurinn Kristín Bjarnadóttir rannsakað?

Nafn þitt

Netfang þitt

Netfang móttakanda

Ruslpóstvörn =

Svar

Hvað hefur vísindamaðurinn Kristín Bjarnadóttir rannsakað?
Kristín Bjarnadóttir er prófessor emerita í stærðfræðimenntun við Menntavísindasvið Háskóla Íslands. Hún hefur rannsakað sögu stærðfræðimenntunar á Íslandi. Megináhersla í rannsóknum hennar hefur verið á breytingar sem urðu á Íslandi á sjöunda áratug tuttugustu aldar í kjölfar námstefnu sem haldin var í Royaumont í Frakklandi árið 1959 um nýja hugsun í stærðfræði og hina svonefndu nýju stærðfræði. Hún rannsakaði menntapólitískar áherslur yfirvalda við þessar breytingar en einnig á öðrum tímamótum, sem sagt árin 1877 og 1904 þegar ákveðið var að stofna ekki stærðfræðideild við Lærða skólann í Reykjavík, og árið 1919 þegar stofnuð var stærðfræðideild við Menntaskólann í Reykjavík. Hún hefur rannsakað og greint íslenskar kennslubækur í stærðfræði fyrir börn og ungmenni allt frá ritgerðinni Algorismus frá 13. öld fram til síðustu aldamóta. Hún hefur einnig skrifað um árangur íslenskra nemenda í stærðfræði í PISA-rannsókninni.

Kristín er virk í alþjóðlegum rannsóknarhópi um sögu stærðfræðimenntunar. Hópurinn hélt fyrstu ráðstefnu sína í Garðabæ á vegum Menntavísindasviðs Háskóla Íslands árið 2009 en hefur síðan haldið ráðstefnur annað hvert ár í Lissabon, Uppsölum, Torino og Utrecht og undirbýr nú sjöttu ráðstefnuna í Marseille í september árið 2019. Hún hefur setið í ritstjórn ráðstefnurita í framhaldi af þessum ráðstefnum.

Kristín fæddist 20. september 1943 í Ólafsvík og ólst upp í Reykjavík. Hún lauk stúdentsprófi frá Menntaskólanum í Reykjavík 1963, BA-prófi í eðlisfræði og stærðfræði frá Háskóla Íslands árið 1968 og prófi í uppeldisfræði og kennslufræðum frá HÍ árið 1971. Hún lauk M.Sc.-gráðu í stærðfræði frá Háskólanum í Oregon í Bandaríkjunum árið 1983 og PhD-gráðu í stærðfræðimenntun frá Háskólanum í Hróarskeldu í Danmörku árið 2006. Doktorsritgerðin fjallaði um stærðfræðimenntun á Íslandi í sögulegu samhengi – félagsleg og efnahagsleg áhrif og áskoranir.

Hún kenndi stærðfræði og eðlisfræði við Vogaskóla í Reykjavík, Kvennaskólann í Reykjavík og Grunnskólann í Stykkishólmi fram til 1981, og við Fjölbrautaskólann í Garðabæ á árunum 1983 – 2003 þar sem hún gegndi stjórnunarstörfum. Kristín var ráðin lektor við Kennaraháskóla Íslands árið 2003 og varð síðan dósent og prófessor við Menntavísindasvið Háskóla Íslands. Hún sat um skeið í háskólaráði Kennaraháskólans.

Kristín hefur ritað kennslubækur í stærðfræði og skrifað greinar um rannsóknir sínar á sviði sögu stærðfræðimenntunar í fagtímarit, svo sem International Journal for the History of Mathematics Education, NOMAD – Nordisk Matematikkdidaktikk, og Convergence – vefrit Mathematics Association of America, auk greina í Netlu, og Tímariti um uppeldi og menntun og margra greina í ráðstefnuritum. Hún situr í ritnefnd NOMAD. Hún skrifar reglulega pistla um söguleg efni í Flatarmál – Tímarit samtaka stærðfræðikennara, og fyrir Vísindavefinn.

Kristín stýrði Norðurlandaráðstefnu samtaka raungreinakennara árið 1990. Hún tók þátt í ritun námskráa í stærðfræði fyrir grunnskóla og framhaldsskóla árið 1989 og stýrði faghópum um ritun námskráa í stærðfræði fyrir grunnskóla og framhaldsskóla árið 1999.

Mynd:

• © Kristinn Ingólfsson.

...