Hvaða rannsóknir hefur Margrét Elísabet Ólafsdóttir stundað?

Nafn þitt

Netfang þitt

Netfang móttakanda

Ruslpóstvörn =

Svar

Hvaða rannsóknir hefur Margrét Elísabet Ólafsdóttir stundað?
Margrét Elísabet Ólafsdóttir er lektor í listum við kennaradeild Háskólans á Akureyri ásamt því að starfa sjálfstætt að verkefnum á sviði lista, svo sem ritstjórn, sýningarstjórn og greinarskrifum fyrir sýningar.

Rannsóknir Margrétar eru á sviði list- og fagurfræði. Rannsóknir hennar hafa beinst að tengslum listar og tækni, sem hún hefur skoðað út frá bæði heimspeki og listasögu. Margrét hefur beint sjónum sínum sérstaklega að raf- og stafrænum listum á Íslandi, en þær rannsóknir leiddu til þess að hún fór að skoða íslenska listasögu í víðu menningarsögulegu samhengi. Með því hefur hún getað varpað ljósi á hvernig þróun listasköpunar á sviði raf- og stafrænna lista á Íslandi hefur mótast við ákveðnar ytri aðstæður. Margrét hefur einnig stundað rannsóknir á fagurfræðilegum straumum í listum sem höfðu áhrif á átakalínur í íslenskri myndlist við upphaf 20. aldar. Í gegnum starf sitt sem lektor við Háskólann á Akureyri hefur hún verið þátttakandi í alþjóðlegum rannsóknarhópi sem skoðar stafrænt læsi og sköpunarhæfni ungra barna.

Margrét hefur verið virk í félagsstörfum og stofnaði meðal annars Lornu, félag áhugamanna um rafræna list árið 2002 ásamt hópi listamanna. Markmið félagsins var að efla raf- og stafrænar listir á Íslandi með sýningum og skipulagi listahátíð, ásamt því að taka þátt í innlendum og erlendum samstarfsverkefnum. Félagið tók þátt í að stofna Lorna Lab, þverfaglegan vettvang lista- og fræðimanna árið 2010 sem hafði aðstöðu í Útgerðinni, Hugmyndahúsi háskólanna.

Þátttaka Margrétar í starfi þessara félaga hefur verið þýðingarmikil fyrir rannsóknarstörf hennar. Hún tók þátt í að rita skýrslu um norræna menningu stafrænna miðla (2004) og hefur flutt fjölda fyrirlestra um efnið á alþjóðlegum ráðstefnum og listahátíðum, auk þess að birta greinar í innlendum og erlendum tímaritum. Hún hefur einnig skipulagt sýningar byggðar á rannsóknum, svo sem Íslensk vídeólist frá 1975 til 1990 í Listasafni Reykjavíkur árið 2013 og Sköpun sjálfsins. Expressjónismi í íslenskri myndlist frá 1915-1945 í Listasafni Árnesinga árið 2017. Grein eftir hana um expressjónisma á Íslandi birtist nýverið í bókinni The Routledge Companion to Expressionism in a Transnational Context. Í lok ársins kemur út bókin Digital Dynamics in Nordic Contemporary Art með kafla eftir hana um stafrænar listir á Íslandi.

Margrét Elísabet er fædd árið 1965. Hún stundaði háskólanám við Université Paris 1 í Frakklandi og er með doktorspróf í list- og fagurfræði.

Mynd:

• Úr safni MEÓ.

...