Í hvaða hæð frá jörðu er vindhraði mældur?

Nafn þitt

Netfang þitt

Netfang móttakanda

Ruslpóstvörn =

Svar

Í hvaða hæð frá jörðu er vindhraði mældur?
Öll spurningin hljóðaði svona:

Í hvaða hæð frá jörðu er vindhraði mældur? Skiptir máli í hvaða hæð hann er mældur?

Vindhraði er að jafnaði mældur í 10 metra hæð yfir jörðu og er það í samræmi við reglur Alþjóðaveðurfræðistofnunar Sameinuðu þjóðanna. Það kostar töluvert að koma vindhraðamæli upp í 10 metra hæð og þess vegna mæla margir vindinn nær jörðu. Algengt er til dæmis að vindhraðamælar Vegagerðarinnar séu í 6-7 metra hæð yfir umhverfi mælisins.

Almennt gildir að vindhraði minnkar eftir því sem nær dregur jörðu. Um það gildir jafnan

$$Uz = \frac{u_*}{\kappa} \ln \left( \frac{z}{z_0} \right) $$

Þar sem Uz er vindhraði í hæðinni z, U_* er svokallaður viðnámsvindur, k er 0,4, z er hæð yfir jörð og z₀ er svokallað hrýfi (e. surface roughness).

Hrýfið er háð yfirborðsgerð landsins og er víða 2-4 cm yfir móum og melum á Íslandi, en sjá má ýmis hrýfisgildi í töflu í heimildaskrá. Ef vindur er þekktur í hæðinni z má nota jöfnuna að ofan til að reikna viðnámsvindinn. Til að reikna vindhraða í nýrri hæð er gert ráð fyrir að viðnámsvindur sé fasti.

Í minningu margra var alltaf gott veður þegar þeir voru lítil börn. Það kann að vera vegna þess að lítil börn eru að jafnaði í minni vindi en fullorðnir, vegna þess að þau eru svo lágvaxin. Líklegt er þó að fleiri skýringar geti verið á minningum af þessu tagi.

Heimild og ítarefni:

• Tafla sem sýnir gildi á hrýfi (z₀): Typical values of surface roughness length Z0. (Sótt 28.05.2024).

Mynd:

• 2022 State of Climate Services: Energy. (Sótt 28.05.2024).

...