Er óhætt fyrir astmasjúklinga að nota innöndunarlyf sem veikja ónæmiskerfi á meðan COVID-19-faraldurinn gengur yfir?

Nafn þitt

Netfang þitt

Netfang móttakanda

Ruslpóstvörn =

Svar

Er óhætt fyrir astmasjúklinga að nota innöndunarlyf sem veikja ónæmiskerfi á meðan COVID-19-faraldurinn gengur yfir?
Daði spurði upprunalega um tvennt sem tengist sjúkdómnum COVID-19. Hér er seinni hluta spurningarinnar svarað en öll spurningin var svona:

Er vitað á þessari stundu hvort ónæmisbælandi meðferð (s.s. sterar, methotrexate eða líftæknilyf) auka líkur á alvarlegri kórónuveirusýkingu? Veikja innöndunarlyf eins og Ventoline eða Flixotide ónæmiskerfið?

Ventoline inniheldur virka efnið salbútamól og er notað við astma sem innúðalyf eða innöndunarduft. Lyfið er svokallaður beta-örvi sem dregur úr berkjukrampa og víkkar berkjur með áhrifum sínum á ósjálfráða taugakerfið. Þetta lyf hefur lítil sem engin áhrif á ónæmiskerfið og geta astmasjúklingar notað það óhræddir í kórónuveirufaraldrinum sem geisar. Á markaði hér eru nokkur fleiri lyf með sambærilega verkun og má þar nefna Bricanyl og Serevent sem dæmi. Þessi lyf hafa ekki heldur áhrif á ónæmiskerfið.

Flixotide inniheldur virka efnið flútíkasón sem er einnig notað við astma sem innúðalyf eða innöndunarduft. Þetta lyf er steri (önnur heiti eru barksteri og sykursteri) sem verkar staðbundið í berkjum og dregur úr bólgu. Barksterar veikja ónæmiskerfið og auka hættu á sýkingum en sú hætta er mjög lítil þegar lyfin eru gefin sem innúðalyf. Lyfin verka staðbundið í berkjum og áhrif annars staðar í líkamanum eru sáralítil nema helst eftir langtímanotkun mjög stórra skammta. Af öðrum lyfjum með sambærilega verkun má helst nefna Pulmicort (inniheldur virka efnið búdesóníð).

Astmasjúklingar sem nota Ventoline, Flixotide eða sambærileg innöndunarlyf geta því óhræddir haldið því áfram þrátt fyrir COVID-19.

Heimild:

• Lyfjastofnun. Sérlyfjaskrá. https://www.serlyfjaskra.is/. (Sótt 27.03.2020).

Mynd:

• File:Adult Using an Asthma Inhaler (29251369035).jpg - Wikimedia Commons. (Sótt 27.03.2020).

...