Ég er staddur á Balí á leið til Taílands, er þá Taíland útland?

Nafn þitt

Netfang þitt

Netfang móttakanda

Ruslpóstvörn =

Svar

Ég er staddur á Balí á leið til Taílands, er þá Taíland útland?
Hugtakið útlönd vísar til allra annarra landa en ‚heimalands‘ þess sem talar eða skrifar. Einfalda svarið við spurningunni er þess vegna: Ef spyrjandi er staddur á Balí á leið til Taílands, þá er hann að fara úr einu útlandi í annað útland.

Eintölumyndin útland er hins vegar sjaldgæf og þá nær alltaf með ákveðnum greini, til dæmis: ‚ég er í útlandinu‘. Þetta gæti verið ástæða spurningarinnar. Þegar menn eru komnir til útlanda, þá er engin sérstök ástæða að tiltaka nánar að nú fari þeir úr einu útlandi yfir í það næsta og síðan kannski til þriðja, fjórða og fimmta útlandsins. Útlönd eru einfaldlega safnheiti yfir öll önnur lönd en heimalandið og hugtakið er sjaldnast haft um stök lönd. Þess vegna finnst líka flestum það vera eðlilegt mál að segjast vera á leið til útlanda, þó ætlunin sé bara að fara til eins lands áður en snúið er aftur heim. Þá er merkingin sú að fara frá heimalandinu.

Svo má einnig nefna að við notum ekki rökrétta andheitið innland um heimalandið. Þegar dvöl okkar í útlöndum er lokið þá fara flestir aftur heim en ekki til ‚innlandsins‘ og við notum atviksorðið innanlands en ekki ‚innlands‘ (né ,innlendis'), þegar við ferðumst um heimalandið.

Mynd:

• File:Tourist is massaging on Bali.jpg - Wikimedia Commons. (Sótt 31.08.2020). Myndin er birt undir leyfinu Creative Commons — Attribution-ShareAlike 2.0 Generic — CC BY-SA 2.0.

Höfundur þakkar Ara Páli Kristinssyni, rannsóknarprófessor hjá Stofnun Árna Magnússonar í íslenskum fræðum, fyrir yfirlestur og gagnlegar athugasemdir....