Hvers vegna heitir allt „Sindra“ á Hornafirði?

Nafn þitt

Netfang þitt

Netfang móttakanda

Ruslpóstvörn =

Svar

Hvers vegna heitir allt „Sindra“ á Hornafirði?
Við þessari einföldu spurningu er til einfalt svar. Það er vegna Ungmennafélagsins Sindra.

Sindri var stofnaður árið 1934 á Höfn í Hornafirði og hefur síðan þá verið miðpunktur í félagsstarfi og íþróttalífi bæjarins. Sindrabragginn eða Bíóbragginn hýsti fyrstu félagsaðstöðuna sem tekin var í notkun 1944 og gerð úr tveimur aflögðum herbröggum. Síðar stóð Sindri, ásamt fleirum, fyrir því að reisa Sindrabæ sem var félagsheimili bæjarins um langt skeið. Íþróttasvæði bæjarins er kennt við ungmennafélagið og kallað Sindravellir. Félagið hefur auk hefðbundins ungmennafélags- og íþróttastarfs í gegnum tíðina sinnt menningarmálum á breiðum grundvelli, til dæmis gengist fyrir leiksýningum og rekið kvikmyndahús.

Nafnið Sindri er komið úr norrænni goðafræði. Annars vegar vísar það til dvergs sem bar þetta nafn. Hann þótti mikill völundarsmiður og smíðaði meðal annars hamarinn Mjölni og hringinn Draupni. Hins vegar vísar heitið til salar eins í Gimli. Sá var gerður af rauðu gulli og þar skyldu búa „góðir menn og siðlátir“ eins og segir í Gylfaginningu Snorra-Eddu. Merking orðsins og nafnsins vísar til sagnarinnar sindra sem merkir að glampa eða glóa.

Mynd:

• Facebook - Tónskóli Austur-Skaftafellssýslu. (Sótt 11.6.2021).

...