Af hverju eru flæmingjar bleikir?

Nafn þitt

Netfang þitt

Netfang móttakanda

Ruslpóstvörn =

Svar

Af hverju eru flæmingjar bleikir?
Einhvers staðar segir 'þú ert það sem þú étur'. Þetta má vel heimfæra á flamingóa, eða flæmingja eins og þeir eru líka kallaðir á íslensku, því bleiki eða ljósrauði liturinn sem einkennir þá er tilkominn vegna fæðunnar sem þeir innbyrða. Í reynd eru flæmingjar ljósgráleitir þegar þeir koma úr eggi og fá ekki þennan sérstaka lit fyrr en þeir eru stálpaðir.

Helsta fæða flæmingja eru blágrænir þörungar sem innihalda litarefni sem kallast beta-karótín. Þeir éta einnig rækjur og önnur krabbadýr sem hafa tekið litarefnið upp frá þörungunum. Karótín gefur rauðan eða appelsínugulan lit og er sama litarefnið og finnst til dæmis í gulrótum, sætum kartöflum og fleira grænmeti. Við meltingu fæðunnar brjóta ensím í lifrinni karótínið niður og það binst síðan við fitufrumur. Liturinn á efninu kemur svo fram þegar fitufrumurnar eru notaðar í myndun fjaðra og endurnýjun goggs. Þannig fær fjaðrahamur flæmingja og goggur þeirra þetta bleika eða ljósrauða yfirbragð.

Hversu dökkur eða skær litur flæmingja er ræðst af því hvernig fæða þeirra er samsett, hversu mikið af litarefninu þeir komast yfir. Rétt er að taka fram starfsmenn dýragarða gæta þess yfirleitt að fóðra flæmingja í haldi manna á mat sem inniheldur beta-karótín, sé það ekki gert dofnar litur þeirra smám saman.

Heimildir og mynd:

• Ibrahim Sawal. Why are flamingos pink? New Scientist. (Sótt 1.2.2021).
• John Staughton. (2020). Why Are Flamingos Pink? Science ABC. (Sótt 1.2.2021).
• Flamingo - Wikipedia.org. (Sótt 1.2.2021).
• Mynd: Flamingos Laguna Colorada.jpg - Wikimedia Commons. Höfundur myndar: Valdiney Pimenta. Birt undir Creative Commons Attribution 2.0 Generic leyfi. (Sótt 1.2.2021).

...