Hver fann upp límmiðann og af hverju?

Nafn þitt

Netfang þitt

Netfang móttakanda

Ruslpóstvörn =

Svar

Hver fann upp límmiðann og af hverju?
Límmiðar af því tagi sem flestir þekkja komu til sögunnar árið 1935 þegar bandaríski uppfinningamaðurinn R. Stanton Avery (1907-1997) skeytti saman mótor úr þvottavél, nokkrum vélarhlutum úr saumavél, útskurðarsög og öðru sem til þurfti.

Afraksturinn var ný tegund af vél sem gat framleitt límmiða sem voru „sjálflímandi“. Þá þurfti hvorki að sleikja né dýfa í vatn eða lím áður en þeir voru festir við flöt. Límið var á miðunum og til þess að festa miðana á eitthvað þurfti einungis að fjarlægja varnarlagið af líminu. Fyrir þetta afrek hlaut Stanton viðurnefnið „Stan the sticker man“, sem mætti útleggja sem „Límmiða-Stjáni“.

Saga límmiða sem slíkra á sér þó töluvert lengri sögu. Frímerki eru nokkurs konar límmiðar en þau þarf að sleikja eða dýfa í vatn áður en þau eru fest á umslög. Frímerki komu fram á sjónarsviðið 1840 en um sögu þeirra má lesa í svari við spurningunni Hvernig varð frímerkið til? Þá hafa límmiðar lengi verið notaðir til auglýsinga og til þess að auðkenna eina vöru frá annarri, eins og þekkist á vínflöskum og annars konar drykkjum.

Ekki er hægt að segja til um af hverju R. Stanton taldi þörf á að finna upp vél til að búa til límmiða. Hann tryggði sér einkaleyfi fyrir límmiðunum eftir uppfinninguna og stofnaði fyrirtækið Kum Kleen Products. Fyrirtækið er í dag hluti af Avery Dennison Corporation en það seldi límmiða og annars konar merkjavarning fyrir 7,2 milljarða Bandaríkjadala á árinu 2018.

Heimildir og mynd:

• Avery Dennison Corporation - Annual Reports. Sótt 12.02.21.
• Chervolet Impala bumper sticker - Wikimedia Commons. Sótt 12.02.2021
• Lithography - Encyclopædia Britannica. Sótt 12.02.21.
• New York Times - R. Stanton Avery, 90, Inventor and Producer of Self-Sticking Labels. Sótt 12.02.21.
• Sir Rowland Hill - Encyclopædia Britannica. Sótt 12.02.21.

...