Hvaða merkingu hefur nafnið Brotefa eða Broteva?

Nafn þitt

Netfang þitt

Netfang móttakanda

Ruslpóstvörn =

Svar

Hvaða merkingu hefur nafnið Brotefa eða Broteva?
Nafnið kemur fyrir á einni konu í Húnavatnssýslu í manntalinu 1703 skrifað Brettefa og á sex konum skrifað Bretteva, einni í Múlasýslu og fimm í Þingeyjarsýslu. Einnig var skráð víxlmyndin Broteva sem nafn einnar konu í Eyjafjarðarsýslu. Sú mynd var skráð á mannanafnaskrá 2023 og ein kona bar það sem einnefni eða fyrra nafn 1. janúar 2025. Sú ritmynd öðlaðist staðbundnar vinsældir snemma á 19. öld.

Samkvæmt manntali 1816 báru sex konur í Skagafjarðar- og Eyjafjarðarsýslum nafnið Broteva og árið 1845 voru enn sex konur með þessu nafni í sömu sýslum. Samkvæmt manntali 1910 hét ein kona í Eyjafjarðarsýslu þessu nafni. Sjálfsagt hafa báðar ritmyndirnar lifað hlið við hlið því að í úrvinnslu úr manntalinu 1855 er þeirra beggja getið.

Brettifa þekktist sem kvenmannsnafn í Noregi á 16. öld en eldri heimild um nafnið er í bæjarheitinu Brettiuo garðr í Valdres. (Janzén 1948:143). Hugsanlega hefur nafnið borist hingað frá Noregi. Nafnið er leitt af fornenska orðinu beorht, bright ‘bjartur’ og gifu ‘gjöf’. Það er talið tökunafn úr fornensku, en heimildir eru til um fornenska dýrlingsheitið Brihtgifu, Bricteua. Það er talið merkja ‘hin bjarta, skínandi gjöf’. Brettevumessa er 11. janúar.

Heimildir og mynd:

• Janzén, Assar. 1948. Personnamn. Stockholm, Oslo, København.
• Leit á vef: Behind the name. https://www.behindthename.com
• Yfirlitsmynd: Manntalsvefur Þjóðskjalasafns Íslands. https://manntal.is
• Manntalsvefur Þjóðskjalasafns Íslands. (Sótt 13.04.2026).

...