Hvers konar nöfn fengu fyrstu flugvélar á Íslandi?

Nafn þitt

Netfang þitt

Netfang móttakanda

Ruslpóstvörn =

Svar

Hvers konar nöfn fengu fyrstu flugvélar á Íslandi?
Flugvélum eru gefin nöfn eins og skipum. Fyrstu íslensku sjóflugvélarnar, sem teknar voru í notkun hérlendis, fengu nöfn eftir sjófuglum og voru nefndar Veiðibjallan og Súlan.

Þegar Loftleiðir tóku til starfa eignaðist félagið tvær vélar sem það gaf nöfnin Hekla og Geysir eftir þekktustu örnefnum landsins. Flugfélag Akureyrar gaf fyrstu vél sinni nafnið Örn eftir stærsta og tígulegasta fuglinum í íslenska dýraríkinu. Eftirlitsflugvél Landhelgisgæslunnar fékk nafnið Rán en Rán var ein af dætrum Ægis, þess guðs sem réði ríkjum í hafinu. Björgunarþyrla Landhelgisgæslunnar fékk nafnið Líf þar sem henni er ætlað að bjarga mannslífum.

Einnig þekkist að sami síðari liður samsetts orðs sé valinn á margar flugvélar sama flugfélagsins. Þannig gaf Flugfélag Íslands vélum sínum nöfn sem enduðu á -faxi, t.d. Glitfaxi, Glófaxi, Gullfaxi, Hrímfaxi, Sólfaxi. Vélar Flugleiða höfðu allar kvenmannsnöfn sem enduðu á -dís, til dæmis Aldís, Ásdís, Bryndís, Eydís, Freydís, Hafdís, Sóldís, Svandís.

Að frátöldum nöfnum sem enda á -dís eru flugvélum sjaldan gefin mannanöfn. Þó hétu vélar Loftleiða, sem einkum flugu vestur um haf, eftir hjónunum Guðríði Þorbjarnardóttur og Þorfinni karlsefni og syni þeirra Snorra Þorfinnssyni, sem þekkt voru fyrir Grænlands- og Vínlandsferðir sínar til forna.

Myndir:

• Yfirlitsmynd (Glitaxi): Facebook. (Sótt 19.06.2025).
• Veiðibjallan á Seyðisfirði Seyðisfjörður Flugvél Aeroplane. (Sótt 19.06.2025).

Þetta svar birtist upprunalega hér og var endurskoðað fyrir birtingu á Vísindavefnum....