Hvað er maður lengi að labba frá Reykjanesbæ til Reykjavíkur?

Svar

Á vef Vegagerðarinnar má meðal annars finna tölulegar upplýsingar um vegalengdir milli hinna ýmsu staða á landinu. Samkvæmt þeim tölum eru 44 km frá Reykjavík til Ytri-Njarðvíkur, 46 km til Keflavíkur og 51 km til Hafna en Reykjanesbær er sveitarfélag sem stofnað var 11. júní árið 1994 með sameiningu sveitarfélaganna Keflavíkur, Njarðvíkur og Hafna. Ekki koma fram upplýsingar um fjarlægð til Innri-Njarðvíkur en eitthvað styttra er í Innri-Njarðvík en Ytri-Njarðvík.

Meðalmaður yrði 9 klukkustundir að ganga frá Reykjanesbæ til Reykjavíkur.

Meðalgönguhraði manna er um það bil 5 km/klst. en ef við miðum við að 45 km séu frá Reykjanesbæ til Reykjavíkur væri meðalmaðurinn 9 klst. að labba áðurnefnda leið. Tölurnar hér að ofan af vef Vegagerðinnar snúa vitanlega að vegakerfinu og því væri ef til vill hægt að spara sér einn og einn kilómetra hér og þar gangi menn ekki meðfram vegum.

Heimildir:

• Vegalengdir | Vegakerfið | Vegagerðin. (Skoðað 6.7.2012).
• Reykjanesbær - Saga. (Skoðað 6.7.2012).
• Preferred walking speed - Wikipedia, the free encyclopedia. (Skoðað 6.7.2012).

Mynd:

• Walking | Flickr - Photo Sharing!. Myndin er birt undir Creative Commons-leyfi en myndrétthafi er o5com. (Sótt 6.7.2012).