Hvernig er rafmagn búið til með jarðhita?

Nafn þitt

Netfang þitt

Netfang móttakanda

Ruslpóstvörn =

Svar

Hvernig er rafmagn búið til með jarðhita?
Hér er einnig svarað spurningunni:

Hvernig virka jarðvarmavirkjanir? Hvernig er raforka framleidd með jarðhita?

Jarðvarmavirkjanir framleiða rafmagn með gufu sem sótt er í jarðskorpuna. Margar þeirra framleiða einnig heitt vatn þar sem það kemur oft með gufunni upp á yfirborðið. Djúpar holur eru boraðar á jarðhitasvæðum til að sækja gufu fyrir virkjanirnar. Flestar slíkar holur eru yfir 1.500 m djúpar, til dæmis nær dýpsta holan á Hellisheiði 3.322 m niður í jörðina. Svokölluð borholuhús eru sett upp yfir holurnar og þar inni tengjast þær flutningslögnum virkjunarinnar.

Vatnið og gufan frá borholunum eru svo leidd í svokallaða gufuskilju þar sem vatnið og gufan eru aðskilin. Vatnið sem nú kallast skiljuvatn er leitt í varmaskipti þar sem kalt grunnvatn er hitað upp með skiljuvatninu. Grunnvatnið og skiljuvatnið blandast þó ekki því varmaskiptirinn hefur tvískipt lagnakerfi sem gerir það að verkum að skiljuvatnið kólnar en grunnvatnið hitnar. Svo er upphitaða grunnvatninu veitt til byggða þar sem almennir notendur nýta það sem heitt vatn. Skiljuvatninu er hins vegar skilað aftur niður í jörðina í svokölluðum niðurdælingarholum. Þar hitnar niðurdælingarvatnið á ný og endurnýtist í framleiðslu virkjunarinnar.

Hluta gufunnar sem kemur úr gufuskiljunni er veitt í svokallaða gufuháfa. Þetta er gert vegna þess að magn gufunnar sem fer inn á kerfið er breytilegt og það þarf að vera hægt að hafa stjórn á þrýstingnum í gufulögninni. Gufunni er svo veitt áfram inn í vélasamstæðu þar sem gufan snýr svokölluðum gufuhverflum. Í hverflunum eru blöð sem gufan snýr, en þeir snúa svo rafölum þar sem rafmagnsframleiðslan fer fram.

Rafalar umbreyta vélrænni orku í raforku með því að snúa seglum inni í stórri spólu og mynda þannig rafstraum. Raforkunni er að lokum veitt á spennustöð þar sem spennan á rafmagninu er hækkuð til að minnka tap þegar það er flutt til byggða. Á áfangastað er spennan svo lækkuð aftur áður en rafmagnið fer til notenda.

Heimildir:

• Jarðvarmavirkjanir Orkuveitu Reykjavíkur. (Skoðað 31.08.2016).
• Nokkrar jarðhitaborholur á Íslandi - Orkuveita Reykjavíkur. (Skoðað 31.08.2016).
• Orka nátúrunnar. (Skoðað 31.08.2016).
• Vinnslurás - Orkuveita Reykjavíkur. (Skoðað 31.08.2016).
• How Geothermal Energy Works - Union of Concerned Scientists. (Skoðað 31.08.2016).
• How a geothermal power plant works (simple) - Office of Energy Efficency and Renewable Energy. (Skoðað 31.08.2016).

Myndir: Úr safni höfundar....