Hvaða tvær stjörnur sjást í norðvestri þessa dagana um kl. 21.00?

Svar

Undanfarnar vikur hafa reikistjörnurnar Venus og Júpíter skinið skært á kvöldhimninum í vestri. Venus hefur smám saman verið að hækka á lofti á meðan Júpíter lækkar þegar hann nálgast sólina.

Venus er næstbjartasta fyrirbæri stjörnuhiminsins og Júpíter þriðja bjartasta. Aðeins tunglið er bjartara.

Venus er oft og tíðum næstbjartasta fyrirbæri næturhiminsins á eftir tunglinu. Hér er hún svo björt að hún kastar bjarma á hafflötinn.

Milli 9. og 17. mars 2012 skildu aðeins fimm gráður reikistjörnurnar að. Þær féllu þess vegna vel inn í sjónsvið dæmigerðs handsjónauka. Hámarkinu var náð 13. mars þegar aðeins 3 gráður skildu á milli þeirra.

Hægt er að nálgast ýmsar upplýsingar um stjörnuskoðun á Stjörnufræðivefnum. Þar eru meðal annars að finna stjörnufræðikort fyrir Ísland sem Stjörnufræðivefurinn útbýr fyrir hvern mánuð og virkni norðurljósa yfir norðurhveli jarðar.

Einnig er auðvelt er að nálgast upplýsingar um afstöðu stjarna og annarra ljósfyrirbæra á himninum í tveimur ókeypis stjörnufræðiforritum sem þýdd hafa verið á íslensku: Stellarium og AstroViewer.

Mynd:

• Venus on the Water á My-spot.com. Sótt 29. 01. 2008.

---

Þetta svar birtist upprunalega á Stjörnufræðivefnum og bloggsíðu Stjörnufræðivefsins og er birt hér í örlítið breyttri mynd með góðfúslegu leyfi.

Spurningin í heild sinni hljóðaði eftirfarandi:

Hvaða tvær stjörnur (sú skærari sennilega Venus) eru í norðvestri þessa dagana um kl. 21.00. Afstaða á milli þeirra hefur breyst lítillega en hér er örugglega um sömu tvær stjörnur að ræða.