Er hættulegt að vera í rafmagnsbíl í eldingaveðri?

Nafn þitt

Netfang þitt

Netfang móttakanda

Ruslpóstvörn =

Svar

Er hættulegt að vera í rafmagnsbíl í eldingaveðri?
Elding í mótun skynjar bifreið sem holan rafleiðara með einangrandi undirlagi. Þetta eru ytra byrði bílsins annarsvegar og hjólbarðar hinsvegar. Rafstraumar, og þar með taldar eldingar, leita alltaf auðveldustu leiðar á milli póla. Bíllinn styttir vegalengdina milli rafhlaðinna skýja og jarðar, og dregur þannig eldinguna til sín. Með öðrum orðum, það eru meiri líkur á að eldingu slái niður í bílinn en næsta umhverfi hans, ef bíllinn er á flatlendi og er ekki falinn milli bygginga, trjáa eða kletta. Hjólbarðarnir einangra bílinn frá jörð og sjá til að það er ekki algengt að eldingum slái niður í bíla. En það gerist þó af og til.

En rafstraumur í eldingu hleypur eftir rafleiðandi ytra byrði bílsins, svo farþegar eru vel varðir inni í bílnum. Bílskelin beinir þannig rafstraumnum framhjá farþegum bílsins og verndar þá. Rými af þessu tagi eru kölluð Faraday-búr og eru notuð víða til að hlífa viðkvæmum rafrásum. Farþegarnir eru öruggari inni í bílnum en utan hans í eldingaveðri. Hitamyndunin vegna rafstraumsins verður mest þar sem hann brýtur sér leið í gegnum illa leiðandi hjólbarðana til jarðar.

Skemmdir á bifreiðum vegna eldinga eru helst á hjólbörðum, á viðkvæmum skynjurum eða tölvurásum. Eldingum slær helst niður í loftnet bifreiða og þeim er hætt við að bráðna. Eldsvoðar í bifreiðum af völdum eldinga eru sjaldgæfir en koma fyrir. Oftast byrja þeir í hjólbörðum.

Eldingin sér lítinn mun á bifreiðum með sprengihreyfil eða rafhreyfil. Báðum tegundum fylgir orkugeymsla sem er varin inni í bílskelinni. Sprengihreyflinum fylgir tankur með fljótandi eldsneyti og rafhreyflinum rafhlaða. Í báðum tilvikum er bruni í orkugeymslunni hættulegt mál.

Ekki hefur orðið vart við meiri hættu á íkveikju í orkugeymslu rafbíla en bifreiða með sprengihreyfla.

Í eldingaveðri ætti ekki að tengja rafbíla við hleðslustöð því þá er komin tenging bílsins við jörð, svo hjólbarðarnir einangra hann ekki lengur. Jarðtengingin eykur hættu á að eldingu slái niður í bílinn verulega.

Myndir:

• itoldya420. (Sótt 26.03.2026).
• My Chase Vehicle Under Lightning - Flickr. (Sótt 26.03.2026). Myndina tók Kelly DeLay og hún er birt undir CC-leyfi.

...