Hverjir sjá um mælingar, skráningar og rannsóknir á jarðskjálftum á Íslandi?

Nafn þitt

Netfang þitt

Netfang móttakanda

Ruslpóstvörn =

Svar

Hverjir sjá um mælingar, skráningar og rannsóknir á jarðskjálftum á Íslandi?
Nú á dögum hefur Veðurstofa Íslands það hlutverk að reka net jarðskjálftamæla til að fylgjast með og skrá skjálftavirkni landsins. Netið er þéttast á virkustu svæðunum, það er umhverfis flekaskilin sem liggja í gegnum landið frá Reykjanestá og allt til norðurstrandarinnar milli Öxarfjarðar og Skagafjarðar. Skjálftamælarnir nema bylgjur sem berast frá upptökum skjálftanna. Tímasetning á bylgjunum á mismunandi mælum er síðan notuð til að staðsetja upptök þeirra. Ætla má að með þessu neti megi staðsetja upptök allra skjálfta á landinu sem eru stærri en 2 stig. Á virkustu svæðunum er næmni kerfisins mun meiri og er þá hægt að staðsetja upptök minni skjálfta, allt niður í 0 stig. Veðurstofan heldur úti vefsíðu, vedur.is, þar sem fylgjast má með skjálftavirkninni nánast í rauntíma. Vefsíðan er mjög notendavæn og er ein hin fullkomnasta sinnar tegundar í heiminum.

Auk hins hefðbundna skjálftamælanets er einnig rekið net sterkhreyfingamæla, einkum til að afla gagna um stóra skjálfta og áhrif þeirra á mannvirki. Rannsóknarmiðstöð Háskóla Íslands í jarðskjálftaverkfræði rekur þetta net, en hún er staðsett á Selfossi. Upplýsingar um Rannsóknarmiðstöðina er að finna á vefsíðunni afl.hi.is.

Rannsóknir á íslenskum skjálftum fara fram víða. Hér á landi fara fram víðtækar skjálftarannsóknir hjá Jarðvísindastofnun Háskóla Íslands, Veðurstofu Íslands og Rannsóknarmiðstöð í jarðskjálftaverkfræði. Þessar stofnanir hafa með sér víðtæka samvinnu um rannsóknirnar, en auk þess taka þátt í þeim rannsóknarstofnanir í öðrum löndum, svo sem í Svíþjóð, Englandi, Frakklandi og Bandaríkjum Norður-Ameríku.

Mynd:

• Fréttir | Um Veðurstofuna | Veðurstofa Íslands. (Sótt 12.9.2012)....