Af hverju fá karlkyns ljón makka en ekki kvenkyns?

Nafn þitt

Netfang þitt

Netfang móttakanda

Ruslpóstvörn =

Svar

Af hverju fá karlkyns ljón makka en ekki kvenkyns?
Það er vel þekkt í náttúrunni að karldýr hafi eitthvað sem hjálpar þeim til að ganga í augun á kvendýrunum. Til dæmis eru karlfuglar oft æði litskrúðugir og er tilgangurinn sá að vekja athygli kvenfuglanna. Makki ljónsins gegnir sama hlutverki og skrautlegar fjaðrir eða litir meðal ýmissa fugla, það er að gera karldýrið glæsilegra í augum kvendýrsins.

Karlljón eru einu kattardýrin sem hafa makka eða fax. Makkinn fer að vaxa þegar ljónin eru 1-2 ára gömul og tekur um 5-7 ár að ná fullri stærð. Litur, lengd og þykkt makkans eru breytileg á milli dýra. Venjulega er makkinn nokkuð dekkri en liturinn á feldi ljónsins og með rauðgulum eða brúnum blæ. Hann getur þó verið mjög dökkur og jafnvel svartur.

Vönuð karldýr fá ekki makka og því er ljóst að kynhormón ráða vexti hans. Makkinn er kyntákn og ljónynjurnar eru hrifnari af ljónum sem hafa þykkan og dökkan makka. Makkinn gerir karlljónin líka stærri og ógnvænlegri og hræðir þannig önnur dýr frá því að ráðast á þau. Einnig getur verið að makkinn hlífi hálsi ljónanna fyrir höggum og rifsárum.

En makkinn gerir karlljónunum líka erfitt fyrir þegar kemur að veiðum. Hans vegna eru þau meira áberandi en ljónynjurnar og eiga því ekki eins auðvelt með að læðast að bráð sinni. Kann þetta að vera ein skýringin á því að karlljón eru miklu lélegri við veiðar en ljónynjur.

Heimildir:

• Undraveröld dýranna / [4. hluti]. Reykjavík: Fjölvi, 1983.
• Lioncrusher.com

...