Sendu inn spurningu

Hér getur þú sent okkur nýjar spurningar um vísindaleg efni.

Hafðu spurninguna stutta og hnitmiðaða og sendu aðeins eina í einu. Einlægar og vandaðar spurningar um mikilvæg efni eru líklegastar til að kalla fram vönduð og greið svör. Ekki er víst að tími vinnist til að svara öllum spurningum.

Persónulegar upplýsingar um spyrjendur eru eingöngu notaðar í starfsemi vefsins, til dæmis til að svör verði við hæfi spyrjenda. Spurningum er ekki sinnt ef spyrjandi villir á sér heimildir eða segir ekki nægileg deili á sér.

Spurningum sem eru ekki á verksviði vefsins er eytt.

Að öðru leyti er hægt að spyrja Vísindavefinn um allt milli himins og jarðar!

=

Hver er þessi frú í Hamborg og af hverju er hún að gefa okkur peninga?

Rannsóknarnefndin sem var skipuð af yfirstjórn Vísindavefsins fyrir skömmu og fjallað er um í svari við spurningunni Hver stal kökunni úr krúsinni í gær? hefur hvorki setið auðum höndum né kyrrum fótum. Fyrstu niðurstöður hennar verða birtar innan tíðar, líklega í þremur stórum tíðabindum.

Bakarasveitinni varð fljótt ljóst að rannsókn á kökustuldinum gæti ekki einskorðast við Ísland heldur þyrfti hún að vera alþjóðlegs eðlis. Rökin fyrir því ættu að vera öllum augljós: Allt hráefni í innlendan bakstur kemur erlendis frá, hveiti, hrásykur, púðursykur að ógleymdum vanilludropum. Ekki reyndist þó unnt að afla upplýsinga frá útlöndum fyrr en eitthvað saknæmt hefði fundist innan landsteinanna. Bergfræðilegar rannsóknir hófust þess vegna strax á landsteinum og niðurstöðurnar liggja nú fyrir. Íslenskir lesendur geta séð þær í svari við spurningunni Hvaða bergtegundir fyrirfinnast nær eingöngu á Íslandi eða hafa séríslensk einkenni? and experts at Interpol and CIA should immediately read the answer to the question Do some special Icelandic stones exist?

Eftir þessa mikilvægu bergfræðilegu vinnu, hófst sex vikna törn í skýrslutökum. Alls hafa 15.000 leikskólabörn mætt í yfirheyrslur. Börnin voru linnulaust spurð af því hver hafi stolið kökunni úr krúsinni í gær? Auk þess voru allar eigur þeirra gerðar upptækar. Sérstaklega þótt eftirtektarvert hversu mörg börn geymdu kúlur í vösum sínum. Víst þykir að umtalsverð lánastarfsemi hafi farið fram með kúlurnar. Að lokum kom að því að sum börnin brotnuðu algjörlega niður eftir átta tíma galsafengna skemmtun. Þá töluðu þau af sér og nefndu til sögunnar ónafngreinda konu, sem þau kalla frúna í Hamborg.


Líklegt er talið að konan á myndinni sé að reyna að skilja við manninn sinn. Þannig hyggst hún dyljast fyrir rannsóknarnefndinni með því að stökkbreyta sér í frökenina í Hamborg. Við munum sjá við þeim leik!

Nú beinast böndin að henni! Eins víst og það er að öll vötn falla til Hamborgar verður frúin þar sett í hin traustustu bönd! Foxillir starfsmenn rannsóknarnefndarinnar linna ekki látum og fara hvorki lönd né strönd fyrr en svo verður. Þótt krosstré, krossbönd og liðbönd okkar bregðist, sverjum við þess eið að koma böndum yfir hana strax með aðstoð allra okkar alþjóðlegu bandamanna!

Flókin svikamylla, þar sem maðkétið og ónýtt korn hefur verið malað og þreskjað í óleyfi af öldnum Hansakaupmönnum, verður senn upprætt. Rætur spillingarinnar og mistakanna liggja bæði djúpt og einnig langt aftur í aldir. Sagnfræðirannsóknir rannsóknarnefndarinnar hafa sýnt að Hansakaupmenn eða Hamborgarar hófu siglingar og verslun hingað strax á 15. öld. Síðan þá hafa menn stolið kökum fyrir illa fengið fé frá frúnni í Hamborg! Svo djúpstæður er vandinn að nú þarf bókstaflega öll þjóðin að biðja alla þjóðina afsökunar! Myllur í Hamborg hafa verið notaðar til að framleiða endalaust bakkelsi og sælgætiskúlur, allt fengið hingað til lands á kúlulánum. Allar þessar upplýsingar þykja mikið vatn á myllu rannsóknarinnar.

Við vitum til þess að frúin í Hamborg fer nú huldu höfði og hefur meðal annars skilið við manninn sinn í því skyni að verða aftur fröken. Rannsóknir málvísindamanna í þjónustu Vísindavefsins hafa hins vegar afgreitt þennan feluleik með einföldum hætti, frú verður aldrei aftur fröken. Hún kemst ekki undan!

Frúin í Hamborg er semsagt kona sem reynir að blekkja okkur með því að segjast vera frökenin í Hamborg. Hún gefur okkur fúna, hveitibaðaða peninga úr myllunni sinni í Hamborg sem við getum hvorki játað né neitað að taka við. Þótt málið sé hvorki svart né hvítt heldur á afar gráu svæði mun rannsóknarnefndin sjá við frúnni og hyggst setja alla hennar peninga í þvottavélar landsmanna! Við tökum ekki við kámugum kúlulánsaurum. Þeir fara beint í þvottinn hjá þrifinni þjóð!


Þess má geta að þetta er kexruglað föstudagssvar og því ber að taka það mátulega alvarlega. Þeir sem hafa ekki fengið nóg af kökum geta lesið svar við spurningunni Hvað er að vera alveg kexruglaður?

Útgáfudagur

27.3.2009

Spyrjandi

Eva Hlín Hermanndsóttir

Höfundur

Tilvísun

Ritstjórn Vísindavefsins. „Hver er þessi frú í Hamborg og af hverju er hún að gefa okkur peninga?“ Vísindavefurinn, 27. mars 2009. Sótt 15. desember 2019. http://visindavefur.is/svar.php?id=48249.

Ritstjórn Vísindavefsins. (2009, 27. mars). Hver er þessi frú í Hamborg og af hverju er hún að gefa okkur peninga? Vísindavefurinn. Sótt af http://visindavefur.is/svar.php?id=48249

Ritstjórn Vísindavefsins. „Hver er þessi frú í Hamborg og af hverju er hún að gefa okkur peninga?“ Vísindavefurinn. 27. mar. 2009. Vefsíða. 15. des. 2019. <http://visindavefur.is/svar.php?id=48249>.

Chicago | APA | MLA

Sendu inn spurningu
eða

Vísindadagatalið

Eyjólfur Ingi Ásgeirsson

1974

Eyjólfur Ingi Ásgeirsson er dósent við Tækni- og verkfræðideild Háskólans í Reykjavík. Rannsóknir hans eru á sviði aðgerðarannsókna með áherslu á bestun, hermun og reiknirit.