Eru fiskar í Tjörninni í Reykjavík?

Nafn þitt

Netfang þitt

Netfang móttakanda

Ruslpóstvörn =

Svar

Eru fiskar í Tjörninni í Reykjavík?
Hér er einnig svarað spurningunni:

Gætuð þið sagt mér frá botnlífi Reykjavíkurtjarnarinnar?

Lífríki Reykjavíkurtjarnar hefur tekið ýmsum breytingum í tímans rás. Í upphafi hefur Tjörnin verið sjávarlón sem sjórinn hefur stíflað með malarkambi og er hún talin hafa lokast af fyrir um 1200 árum. Lækurinn, útfall úr Tjörninni, rann áður opinn út í sjó og þar sem Tjörnin er aðeins í um 2 m hæð yfir meðalsjávarmáli gætti flóðs og fjöru í tjörninni og kom sjór inn í gegnum lækinn. Árið 1913 var Lækurinn settur í stokk og seinna var honum lokað og Lækjargata lögð yfir Lækinn. Nú er búið að koma fyrir loku þannig að einstreymi er út úr Tjörninni og tekur það fyrir sjóblöndun í hana.

Fram til ársins 1962 var skólpi veitt í Tjörnina en nú á að vera búið að koma í veg fyrir alla slíka losun þótt alltaf sé hætta á því að við nýframkvæmdir og lagfæringar komi upp rangar tengingar milli ofanvatnsveitu og skólps.

Síðustu ár virðist lífríki Tjarnarinnar hafa verið í framför að mörgu leyti. Fyrir utan Hústjörnina^[1] þá voru aðrir hlutar Tjarnarinnar gróðurlausir og voru búnir að vera það um alllangan tíma. Um árið 2015 nam vatnaplanta sem kallast smánykra land í Tjörninni og á mjög stuttum tíma hafði hún þakið mjög stóran hluta tjarnarbotnsins. Önnur nykrutegund, fjallnykra, finnst þar einnig en hún er mun sjaldgæfari og er á stangli víðast hvar en þó er hana helst að finna í Hústjörninni.

Við þetta hefur lífríkið í vatninu breyst til batnaðar, hornsílum hefur fjölgað mjög mikið, en það má segja að áður hafi þau aðeins tórt þarna. Einnig bar aðeins á því að blágrænar bakteríur næðu að fjölga sér mikið yfir sumarið en allra síðustu ár hefur þeirra aðeins orðið vart á vorin en þær ná ekki að mynda blóma. Án efa hafa fiskar gengið í Lækinn og Tjörnina á árum áður en ekki er vitað til þess að aðrir fiskar en hornsíli þrífist þar.

Á og í botninum á Tjörninni lifa nokkrir hópar lífvera og í síðustu sýnatöku árið 2021 voru ánar^[2] þar ríkjandi hópur, þá komu smásæ krabbadýr sem kallast vatnaflær, þá lirfur rykmýsflugna og loks annar hópur krabbadýra sem kallast árfætlur. Eru þessir hópar gjarnan algengir í botnseti stöðuvatna.

Náttúrufræðistofa Kópavogs hefur vaktað lífríki Reykjavíkurtjarnar og skoðað efna- og eðlisþætti, vatnagróður, smádýralíf og hornsíli. Á vef stofnunarinnar má skoða niðurstöður: Vöktun á lífríki Reykjavíkurtjarnar - Náttúrufræðistofa Kópavogs.

Tilvísanir:

1. ^ Á korti sem fylgir svari við spurningunni Hvaðan kemur vatnið í Tjörnina í Reykjavík? sést staðsetning Hústjarnarinnar.
2. ^ Ánar tilheyra flokki liðorma (Oligochaeta).

Mynd:

• Tjörnin (The Pond) - Reykjavik | Flickr.com. Höfundur myndar: Kirk K. Birt undir Creative Commons Attribution-NonCommercial-NoDerivs 2.0 Generic leyfi. (Sótt 10.5.2022).

...