Af hverju eru aðventukertin stundum fimm?

Nafn þitt

Netfang þitt

Netfang móttakanda

Ruslpóstvörn =

Svar

Af hverju eru aðventukertin stundum fimm?
Aðventukransar sem við þekkjum á Íslandi eru með fjögur kerti. Hins vegar tíðkast það sums staðar að hafa kertin fimm. Það merkir þó ekki að aðventan sé lengri heldur er fimmta kertið tileinkað Jesúbarninu og kveikt á því á jóladag.

Aðventukransinn byggist á norður-evrópskri hefð. Hið sígræna greni táknar lífið sem er í Kristi og hringurinn táknar eilífðina.

Fyrsta kertið nefnist spádómakertið og minnir á fyrirheit spámanna Gamla testamentisins er höfðu sagt fyrir um komu frelsarans. Annað kertið nefnist Betlehemskertið. Þar er athyglinni beint að þorpinu sem Jesús fæddist í og þar sem ekkert pláss var fyrir hann. Þriðja kertið nefnist hirðakertið en snauðum og ómenntuðum fjárhirðum voru sögð tíðindin góðu á undan öllum öðrum. Fjórða kertið nefnist síðan englakertið og minnir okkur á þá sem báru mannheimi fregnirnar.

Önnur heiti þeirra eru (í sömu röð) kerti vonarinnar, kærleikans, gleðinnar og friðarins.

Samkvæmt evangelísk-lútherskri venju er fyrsta aðventukertið gjarnan hvítt, af því að um Kristssunnudag er að ræða (eins og fyrsti sunnudagur allra tímabila kirkjuársins er nefndur), eða þá fjólublátt eins og hin þrjú. Meðal rómversk-kaþólskra er þriðja kertið hins vegar stundum öðruvísi, það er að segja bleikt eins og sjá má á myndinni hér til hliðar, en er á fjórða aðventusunnudeginum skipt út fyrir þann lit, sem er á hinum þremur. Oft er líka um miðjukerti að ræða, það fimmta, hvítt, og er kveikt á því á jóladag, til heiðurs afmælisbarninu.

Og fleiri útgáfur þessa munu vera til.

Myndir:

• Yfirlitsmynd: Derek Winterburn. (2017). Advent 1. Flickr. Birt undir CC BY-ND 2.0 leyfi. (Sótt 6.12.2024).
• Advent Wreath. Sanctifying Worship. (Sótt 6.12.2024).

...