Hvað getið þið sagt mér um dúfnategundina Ptilinopus arcanus?

Nafn þitt

Netfang þitt

Netfang móttakanda

Ruslpóstvörn =

Svar

Hvað getið þið sagt mér um dúfnategundina Ptilinopus arcanus?
Tegundin Ptilinopus arcanus (e. Negros fruit-dove) er einlend (endemísk) tegund á Filippseyjum. Tegundin er annaðhvort í mikilli útrýmingarhættu eða útdauð. Síðasti staðfesti fundur hennar var árið 1953 á eyjunni Negros sem tilheyrir áðurnefndum Filippseyjum.

Í óstaðfestum heimildum er dúfunnar getið árið 2002 en fullsnemmt verður að telja að úrskurða tegundina útdauða þrátt fyrir að einhverjir leiðangrar hafa verið farnir á hugsanleg búsvæði hennar. Nokkrar aðrar tegundir svokallaðra ávaxtadúfna finnast á eyjunni en þær eru vinsæl veiðibráð innfæddra. Enn fremur hefur griðalegt skógarhögg verið stundað á eyjunni og er nú aðeins um 4% upprunalegra skóga eftir þar. Að vísu er þetta mat frá árinu 1988 svo telja verður víst að talan hafi lækkað enn meira. Með slíkri búsvæðaeyðingu er grundvellinum kippt undan skógarfuglum eins og ávaxtadúfum.

P. arcanus er 16,5 cm á lengd; lítil dúfa með dökkgrænan fjaðurham og gula augnhringi, öskugrátt forenni og gráhvítan háls. Þessi lýsing er aðeins byggð á einum kvenfugli sem varðveittur er á náttúrufræðisafni í London. Þetta eintak var skotið í háu tréi í 1.100 metra hæð yfir sjávarmáli. Ekki er hægt að leggja mat á helstu vistfræðilegu þætti tegundarinnar, hvort hún haldi sig í skógum í fjalllendi eða er láglendisskógarfugl því nú er búið að eyða meira og minna öllu skóglendi undir þúsund metrum á eyjunni. Ef svo reynist hefur tegundin einfaldlega verið þurrkað út sökum þessa.

Mynd:

• Negros Fruit Dove - Negros Fruit Dove Ptilinopus Arcanus. (Sótt 6.3.2023).

...