Ekki er alveg ljóst hvað spyrjandi á við með því að stjörnurnar fari í hringi. Ég svara þess vegna bara báðum spurningunum sem um gæti verið að ræða.

Okkur sýnast fastastjörnurnar fara í hringi kringum himinpólinn sem er nálægt Pólstjörnunni. Þetta er sýndarhreyfing sem kemur til af því að við sjálf erum á hringhreyfingu kringum möndul jarðarinnar og hann vísar alltaf á himinpólinn. Um þetta má lesa nánar í ýmsum svörum á Vísindavefnum til dæmis:

• Hvað er innbyrðis hreyfing?
• Færast stjörnurnar á himninum á kerfisbundinn hátt?

Stundum er líka sagt að reikistjörnurnar fari í hringi um sól. Þær reikistjörnur sem eru á annað borð sýnilegar með berum augum eru Merkúríus, Venus, Mars, Júpíter og Satúrnus. Þær líta út svipað og aðrar stjörnur á himninum en hreyfast hins vegar með ákveðnum hætti miðað við fastastjörnurnar. Þessi hreyfing er allflókin en útfrá henni má komast að því að þær hreyfast í rauninni á brautum kringum sólina. Brautirnar eru nálægt því að vera hringir en eru það þó ekki nákvæmlega. Frekari upplýsingar má finna í eftirfarandi svörum Vísindavefsins:

• Hvernig eru plánetur og reikistjörnur skilgreindar?
• Hvers vegna ganga reikistjörnur eftir sporbaug?
• Hvers vegna haldast reikistjörnurnar á brautum sínum í stað þess að dragast í átt að sólinni?

Stjörnurnar eru kúlulaga af því að þyngdarkraftur milli efnisagnanna í þeim togar þær saman og þær eru í rauninni "mest saman" með því að mynda kúlu. Þannig verður til dæmis orka þeirra minnst. Nánar má lesa um þetta í eftirfarandi svörum:

• Hvers vegna eru plánetur hnöttóttar en ekki kassalaga?
• Hvað veldur aðdráttaraflinu og hvers vegna er það mismunandi milli tungla og reikistjarna?

Frekara lesefni má finna með því að nota leitarvél Vísindavefsins eða smella á efnisorðin hér fyrir neðan.