Hver fann upp tannþráðinn?

Nafn þitt

Netfang þitt

Netfang móttakanda

Ruslpóstvörn =

Svar

Hver fann upp tannþráðinn?
Ekki er vitað með vissu hvenær menn tóku upp á því að hreinsa á milli tanna sinna, en fornleifafræðingar hafa fundið ummerki um notkun einhvers konar þráðar á tönnum frá forsögulegum tímum. Mögulegt er að dýrahár, til dæmis hrossahár, hafi verið notuð til þess.

Bandarískur tannlæknir að nafni Levi Spear Parmly (1790-1859) er sagður hafa fundið upp tannþráðinn árið 1819. Hann mælti með því við sjúklinga sína að þeir renndu vaxhúðuðum silkiþráði á milli tannanna. Tannþráður kom hins vegar ekki á markað fyrr en óvaxhúðaður silkiþráður var framleiddur af fyrirtækinu Codman and Shurtleff árið 1882. Árið 1898 fékk fyrirtækið Johnson & Johnson einkaleyfi á tannþræði sem gerður var úr sama silkiefni og læknar notuðu til að sauma saman skurði á líkamanum.

Á 5. áratug síðustu aldar var silki skipt út fyrir nælonefni. Nælon hefur stöðugri áferð og rifnar síður en silki. Síðan þá hefur ýmsum efnum verið bætt við tannþráðinn; tefloni, bývaxi, gore-texi og fleiru. Mismunandi er eftir framleiðendum hvað er í tannþræðinum.

Mælt er með því að nota tannþráð einu sinni á dag, áður eða eftir að tennurnar eru burstaðar. Með tannþræði nást þau óhreinindi sem tannburstinn nær ekki til og flúorið úr tannkreminu kemst á milli tannanna.

Heimildir:

• American Dental Association. Floss and other interdental cleaners. Sótt 11.7.2019.
• Oral-B. The History of Dental Floss. Sótt 11.7.2019.
• Sanoudos, M. og Christen, A. G. (1999). Levi Spear Parmly: the apostle of dental hygiene. Journal of the History of Dentistry, 47(1), 3-6.

Mynd:

• Timetoast. Types of inventions in the 1815-1880. (Sótt 11.7.2019).

...