Sólin
Rís 05:40 • sest 21:16
Tunglið
Rís 15:13 • Sest 05:59
Flóð
Árdegis: 03:57 • Síðdegis: 16:31
Fjara
Árdegis: 10:23 • Síðdegis: 22:34
Vísindagrein sem fjallar um dreka sem veruleika er þess vegna ekki til, en auðvitað geta vísindin fjallað um hugmyndir manna um sitthvað sem augljóslega telst ekki til veruleikans, og eru mörg dæmi um það á Vísindavefnum, einkum í efnisflokkunum mannfræði og þjóðfræði. Samsvarandi athugasemd á einnig við um drekafræðinga; ekki er sjálfsagt mál að þeir séu til nema þá að útskýrt sé nánar hvað við er átt. Um dreka gildir það sama og um hugtökin ófreskja og skrímsli. Þetta eru ekki fyrirbæri í efnisheiminum heldur tengjast þau hinu dulræna og yfirnáttúrulega. Drekar og aðrar ófreskjur tilheyra frekar heimi bókmennta, trúarbragða og dulspeki en vísinda. Um þetta má lesa nánar í svari við spurningunni Eru til einhverjar staðfestar heimildir um ófreskjur? Okkur sýnist að umfjöllun um drekafræðinga spretti meðal annars af bók sem kom út hjá bókaútgáfunni Bjarti árið 2006. Bókin heitir Drekafræði. Í umfjöllun um bókina á vefsíðu bókaútgáfunnar segir að höfundur hennar sé Doktor Ernest Drake sem hafi verið drekameistari og lifað lengi meðal dreka. Það er rétt að taka fram að þetta er auðvitað skáldskapur en ekki raunveruleiki. Í bókmenntafræði er hugtakið raunveruleikaáhrif (e. reality effect) stundum notað um það þegar þættir í frásögn, sem hafa enga sérstaka þýðingu fyrir atburðarásina, eru notaðir til að skapa eins konar blekkingu sem gefi til kynna að veröld textans sé hliðstæða raunveruleikans. Oft eru þetta smáatriði, til dæmis í umhverfislýsingum eða í hversdagslegum athöfnum persónanna. Í umfjöllun um bókina Drekafræði eru raunveruleikaáhrif notuð. Til dæmis er gefið til kynna að höfundurinn sé vísindamaður eins og þeir sem við þekkjum úr raunveruleikanum. Hann er titlaður Doktor og sagt að hann hafi lifað meðal dreka. Í erlendum textum um bókina höfum við síðan lesið að höfundurinn hafi búið í skógi í Sussex-héraði á Englandi seint á 19. öld og gefið út bók í takmörkuð upplagi um dreka. Eitt eintak bókarinnar á síðan að hafa fundist í fornbókasölu í London árið 1987 og meðfylgjandi var bréf frá höfundinum frá árinu 1904. Allt er þetta hluti af raunveruleikaáhrifum bókarinnar og reynt er að skapa forsögu fræðimanns sem lifði meðal dreka og gaf út bók um þá sem týndist í tæp hundrað ár.
Við bendum lesendum okkar á að í nafni höfundarins er líklega fólgin vísbending um að ekki sé allt sem sýnist. Fornafn hans er Ernest eins konar brengluð mynd af enska nafnorðinu earnest sem merkir meðal annars einlægur og alvarlegur. Þetta er semsagt einlægur og alvarlegur höfundur sem engu að síður tekur sjálfan sig líklega ekki mjög hátíðlega. Eftirnafn höfundarins er tilbrigði við enska heitið á drekum sem er dragon. Fræðimaðurinn ber þannig heiti skepnanna sem hann rannsakar og hann sjálfur er þess vegna tæpast annað en ímyndun, alveg eins og drekarnir. Svo má að lokum geta þess að orðið drake á ensku er haft um andarsteggi. Kannski var Ernest Drake bara að rannsaka endur í skóglendi og hélt að þær væru drekar? Einu raunverulegu drekafræðingarnir sem við þekkjum eru þeir sem fást við rannsóknir á drekum sem tilheyra flokki áttfætlna innan fylkingar liðdýra. Um þess háttar dreka er hægt að lesa í svari við spurningunni Eru til drekar á Íslandi? Eins gætum við líka kallað þá sem rannsaka kómódódreka drekafræðinga. Um kómódódreka er meðal annars fjallað í svari við spurningunni Getur þú sagt mér eitthvað um kómódódreka?
Mynd:
Þetta svar er í flokknum "bekkirnir spyrja" þar sem starfsfólk vefsins svarar spurningum frá grunnskólabekk í kennslustund, samkvæmt samningi. Lögð er áhersla á skjót svör, stutt og aðgengileg. Oft er byggt á öðrum svörum sem kunna að nýtast almennum lesendum betur.
