Sendu inn spurningu

Hér getur þú sent okkur nýjar spurningar um vísindaleg efni.

Hafðu spurninguna stutta og hnitmiðaða og sendu aðeins eina í einu. Einlægar og vandaðar spurningar um mikilvæg efni eru líklegastar til að kalla fram vönduð og greið svör. Ekki er víst að tími vinnist til að svara öllum spurningum.

Persónulegar upplýsingar um spyrjendur eru eingöngu notaðar í starfsemi vefsins, til dæmis til að svör verði við hæfi spyrjenda. Spurningum er ekki sinnt ef spyrjandi villir á sér heimildir eða segir ekki nægileg deili á sér.

Spurningum sem eru ekki á verksviði vefsins er eytt.

Að öðru leyti er hægt að spyrja Vísindavefinn um allt milli himins og jarðar!

=

Vísindafélag Íslendinga - 100 ára

Hvað hefur vísindamaðurinn Þorsteinn Ingi Sigfússon rannsakað?

Þorsteinn Ingi Sigfússon er prófessor í eðlisfræði við Háskóla Íslands og forstjóri Nýsköpunarmiðstöðvar Íslands (frá 2007). Þorsteinn nam eðlisfræði, stærðfræði og efnafræði við Háskólann í Kaupmannahöfn og bauðst svo að koma til doktorsnáms í Cambridge háskóla á Englandi og vinna þar við Cavendish rannsóknastofnunina.

Upphaflega einbeitti Þorsteinn sér að rannsóknum á járnseglinum Ni3Al þar sem leiðnirafeindir skapa seglun. Hann framleiddi einkristalla af efninu og skoðaði rafeiginleika þeirra við afar lágan hita og í sterku segulsviði við lághitaeðlisfræðideild Cavendish rannsóknastofnunarinnar. Þorsteinn var kjörinn „Research Fellow“ við Darwin College í Cambridge árið 1982 en fluttist aftur til Íslands sama ár.

Þorsteinn skoðar afrakstur Megaproject í Tomsk.

Við heimkomuna réðst Þorsteinn til Raunvísindastofnunar Háskólans. Snemma í því starfi kynntist hann áskorunum í málmeðlisfræði hjá Íslenska járnblendifélaginu. Með því að beita svokallaðri Mössbauer tækni tókst honum að greina byggingargalla í kísiljárni sem leitt höfðu til þess að efnið molnaði í flutningum og féll um nokkra gæðaflokka. Þorsteinn setti fram TTT (e. time-temperature-transformation) graf fyrir efnið. Með því að stýra hitasögu efnisins í framleiðslu styrktist það og varð síðan nefnt „strongsil“. Í framhaldi af verkefninu kostaði Járnblendifélagið nýja prófessorsstöðu við Háskóla Íslands. Margir framhaldsnemar komu að rannsóknum á kísiljárni og áli undir stjórn Þorsteins, bæði við Háskóla Íslands og erlenda háskóla.

Á þessum árum beindist áhugi Þorsteins einnig að orkumálum, einkum vetni sem orkubera. Fyrirtækið Íslensk NýOrka var stofnað þegar hafist var handa við að þróa vetnishagkerfi á sviði samgangna. Árið 2003 var sett upp fyrsta vetnisstöðin á Íslandi en Þorsteinn var þá formaður stjórnar Íslenskrar NýOrku, sem hélt utan um verkefnið. Í framhaldinu voru alþjóðasamtökin IPHE (International Partnership for the Hydrogen Energy) stofnuð í Washington af öllum stærstu iðnríkjum heims. Þar var Þorsteinn, ásamt Þjóðverjanum dr. Hanns Joachim Neef, einn tveggja formanna.

Fyrir framlag sitt til vetnismála hlaut Þorsteinn Global Energy Prize verðlaunin í St. Pétursborg árið 2007. Í framhaldi af því stýrði hann mjög stóru rannsóknaverkefni (Megaproject) við Tomsk háskóla þar sem unnið var að rannsóknum á efnarafölum með notkun nýrra himna og eins himna úr fjölliðum sem meðhöndlaðar voru með geislun í kjarnorkuhraðli.

Tæknileg eðlisfræði og nýsköpun tengd henni hafa verið viðfangsefni Þorsteins frá upphafi. Hann hefur staðið að stofnun sprotafyrirtækja á mörgum sviðum. Eitt þekktasta dæmið er Vaki fiskeldiskerfi sem hann stofnaði með Hermanni Kristjánssyni og fleirum og var Þorsteinn fyrsti stjórnarformaður þess. Vaki hefur verið leiðandi í heiminum á sviði þyngdargreiningar á villtum fiski og eldisfiski og beitir ljóstækni við þær mælingar.

Þorsteinn hlaut riddarakross Hinnar íslensku fálkaorðu fyrir samstarf háskóla og iðnaðar árið 2004. Hann fæddist í Vestmannaeyjum, 4. júní 1954.

Mynd:

  • Úr safni ÞIS.
  • Útgáfudagur

    23.8.2018

    Spyrjandi

    Ritstjórn

    Höfundar

    Ritstjórn Vísindavefsins

    Tilvísun

    Ritstjórn Vísindavefsins og Vísindafélag Íslendinga. „Hvað hefur vísindamaðurinn Þorsteinn Ingi Sigfússon rannsakað?“ Vísindavefurinn, 23. ágúst 2018. Sótt 17. júní 2019. http://visindavefur.is/svar.php?id=76207.

    Ritstjórn Vísindavefsins og Vísindafélag Íslendinga. (2018, 23. ágúst). Hvað hefur vísindamaðurinn Þorsteinn Ingi Sigfússon rannsakað? Vísindavefurinn. Sótt af http://visindavefur.is/svar.php?id=76207

    Ritstjórn Vísindavefsins og Vísindafélag Íslendinga. „Hvað hefur vísindamaðurinn Þorsteinn Ingi Sigfússon rannsakað?“ Vísindavefurinn. 23. ágú. 2018. Vefsíða. 17. jún. 2019. <http://visindavefur.is/svar.php?id=76207>.

    Chicago | APA | MLA

    Sendu inn spurningu
    eða

    Vísindadagatalið

    Ása L. Aradóttir

    1959

    Ása L. Aradóttir er prófessor við Auðlinda- og umhverfisdeild Landbúnaðarháskóla Íslands. Rannsóknir hennar snúa flestar að landgræðslu og þá einkum leiðum til að endurheimta hnignandi og skemmd vistkerfi.