Hvaða rannsóknir hefur Stefanía Óskarsdóttir stundað?

Nafn þitt

Netfang þitt

Netfang móttakanda

Ruslpóstvörn =

Svar

Hvaða rannsóknir hefur Stefanía Óskarsdóttir stundað?
Rannsóknir Stefaníu Óskarsdóttur, dósents í Stjórnmálafræðideild Háskóla Íslands, eru á sviði samanburðarstjórnmála með áherslu á íslensk stjórnmál. Síðustu ár hefur Stefanía einkum skoðað þróun þingræðisskipulagsins hérlendis og aðkomu hagsmunasamtaka að opinberri ákvarðanatöku. Hún hefur sýnt fram á að íslensk stjórnskipun þróaðist í átt frá þingræði til forsetaþingræðis á árunum eftir hrun. Það felur í sér aukin pólitísk völd forseta Íslands hvað varðar löggjöf. Þau völd veita forseta jafnframt möguleika á að styrkja pólitískt vægi sitt innan framkvæmdarvaldsins.

Í fræðunum hafa fræðimenn einkum horft til þess hvort að framkvæmdarvaldið liggi bæði hjá ríkisstjórn og forseta þegar forsetaþingræði er skilgreint, löggjafarvaldið hefur aftur á móti fengið minna vægi í skilgreiningu á hugtakinu. Stjórnskipuleg þróun á Íslandi sýnir engu að síður að handhafar löggjafarvaldsins eru mikilvæg breyta í þessu sambandi. Einnig skiptir styrkur þingsins máli þegar kemur að valdajafnvæginu á milli forseta og ríkisstjórnar og sá styrkur hefur meðal annars áhrif á pólitíska túlkun á stjórnarskrárbundnu hlutverki forsetans.

Þegar kemur að aðkomu hagsmunaaðila að opinberri ákvarðanatöku sýna niðurstöður Stefaníu að skipulögð hagsmunasamtök eru mjög gjarnan höfð í ráðum við mótun og framkvæmd opinberrar stefnu á Íslandi. Í samanburði við Skandinavíu er til dæmis núna mun meira um það hérlendis en í Skandinavíu að ráðherrar skipi opinberar nefndir eða ráð, sem í eiga sæti fulltrúar hagsmunasamtaka, til að móta eða framkvæma opinbera stefnu. Slíkt formbundið samráð (e. corporatism) hefur hins vegar mikið gefið eftir í Skandinavíu á síðustu áratugum. Þróunin á Íslandi er því áhugaverð í fræðilegu samhengi og endurspeglar bæði styrk hagsmunasamtaka sem og skipulag og smæð opinberu stjórnsýslunnar á Íslandi.

Um þessar mundir tekur Stefanía þátt í alþjóðlegu rannsóknarsamstarfi um tengsl stjórnmálaflokka og hagsmunasamtaka. Hún vinnur einnig ásamt öðrum að rannsókn á áhrifum hugveitna (e. think tanks) á opinbera stefnumótun og að rannsókn um upplifun þingmanna af þingmannsstarfinu. Hún vinnur enn fremur að bók um almenna stjórnmálaþróun á Íslandi eftir hrun fyrir alþjóðlega útgáfu.

Stefanía hóf störf við Stjórnmálafræðideild Háskóla Íslands árið 2011. Hún lauk doktorsprófi í stjórnmálafræði árið 1995 frá Purdue-háskóla í West Lafayette, Indiana. Áður hafði hún lokið MA-prófi (1988) og BA-prófi (1986) frá sama háskóla. Hún varð stúdent frá Menntaskólanum í Reykjavík árið 1982.

Mynd:

• © Kristinn Ingvarsson.

...