Hvað merkir „nema skör höggvist“ í kvæði Gríms loðinkinna?

Nafn þitt

Netfang þitt

Netfang móttakanda

Ruslpóstvörn =

Svar

Hvað merkir „nema skör höggvist“ í kvæði Gríms loðinkinna?
Í Gríms sögu loðinkinna segir frá því að Grímur gekk að eiga konu sem hét Lofthæna. Þau eignuðust dóttur sem Brynhildur hét. Hún óx upp í Hrafnistu og var hin fegursta mær. Unni Grímur henni mikið. En er hún var tólf ára gömul, bað hennar sá maður, er Sörkvir hét og var Svaðason. Hún vildi ekki eiga hann og fyrir það skorar Sörkvir Grím á hólm. Grímur gengst inn á það. Sörkvir mætir með tólf berserki og eru þeir allir felldir. Grímur kvað þá tvær vísur og er hin seinni svona:

Fyrst mun ek líkja
eptir feðr mínum:
skal-at mín dóttir,
nema skör höggvist,
nauðig gefin
neinum manni,
guðvefs þella,
meðan Grímr lifir.

Orðið skör hefur fleiri en eina merkingu en sú sem hér er vísað til er ‘höfuðhár’. Einnig hefur verið bent á að orðið geti merkt ‘(afhöggvið) höfuð’ eins og til dæmis í 55. kafla Laxdælu. Búið var að höggva höfuðið af Bolla og Þorgerður Egilsdóttir (Skalla-Grímssonar) kvað Guðrúnu Ósvífursdóttur „mundu eiga að búa um rauða skör Bolla um hríð“.

Heimild og mynd:

• Laxdæla saga. Íslenzk fornrit. V. bindi, bls. 168. Hið íslenzka fornritafélag, Reykjavík.
• Mynd: Pxhere.com. Höfundur myndar Zach Dischner. Birt undir Creative Commons Attribution 2.0 Generic (CC BY 2.0) leyfi. (Sótt 24.10.2022).

...