Er leyfilegt að taka mig upp án þess að ég veiti samþykki fyrir upptökunni?

Nafn þitt

Netfang þitt

Netfang móttakanda

Ruslpóstvörn =

Svar

Er leyfilegt að taka mig upp án þess að ég veiti samþykki fyrir upptökunni?
Spurningin í heild sinni hljóðaði svona:

Góðan dag. Má taka mig upp án míns samþykkis, hvort sem um er að ræða videó eða raddupptöku?

Um hljóðupptökur gilda tilteknar reglur sem hægt er að skoða á vef Persónuverndar. Þar segir þetta:

Einstaklingar mega almennt ekki taka upp samtöl manna á milli eða ræður annarra einstaklinga nema með samþykki þeirra sem á upptökunni heyrast.

Hljóðupptaka felur í sér vinnslu persónuupplýsinga ef unnt er að persónugreina þá einstaklinga sem teknir eru upp, t.d. ef þeir segja til nafns eða ef unnt er að ráða út frá efni upptökunnar um hverja ræðir.

Af þessu má ráða að ætli einhver að taka upp samtöl eða ræður annarra einstaklinga sem munu þekkjast á upptökunni, þarf hann að fá samþykki þeirra. Ef einstaklingarnir þekkjast hins vegar ekki á upptökunni þá fellur upptakan ekki undir persónuvernarlög.

Það sama á við um upptöku á símtölum. Ef einhver ætlar að hljóðrita símtal þarf að láta viðmælanda vita að upptaka fari fram.

Persónuverndarlög ná einnig til birtingar á myndum, sér í lagi á Netinu. Ef um er að ræða þjóðlífs- og hversdagsmyndir sem hafa almenna skírskotun þarf ekki endilega samþykki einstaklinga sem gætu sést á myndinni. Ef einstaklingur er hins vegar aðalefni myndbirtingar er hins vegar litið svo á að samþykki hans þurfi fyrir birtingu. Um ljósmyndir sem teknar eru á almannafæri er hægt að lesa meira í svari við spurningunni Hvaða lagaleg réttindi hefur ljósmyndari á almannafæri?

Rétt er að taka fram að myndbirtingar fjölmiðla falla ekki undir þetta þar sem ákvæði persónuverndarlaga eiga þar ekki við nema að litlu leyti.

Heimildir og frekara lesefni:

• Hljóðupptökur - Persónuvernd. Þínar upplýsingar, þitt einkalíf.. (Sótt 12.04.2022).
• Myndbirtingar á Netinu - Persónuvernd. Þínar upplýsingar, þitt einkalíf.. (Sótt 12.04.2022).
• Tjáning einstaklinga á Netinu - Persónuvernd. Þínar upplýsingar, þitt einkalíf.. (Sótt 12.04.2022).

Mynd:

• Young woman recording video of an event with her phone | Flickr. (Sótt 12.04.2022). Myndin er birt undir leyfinu Creative Commons — Attribution 2.0 Generic — CC BY 2.0.

...