Má skjóta hrafna?

Nafn þitt

Netfang þitt

Netfang móttakanda

Ruslpóstvörn =

Svar

Má skjóta hrafna?
Í heild hljóðaði spurningin svona:

Hvað éta hrafnar á veturna? Eru þeir réttdræpir til að halda fjölgun í skefjum? Ef svo er, hvað má þá skjóta marga á ári?

Hrafninn (Corvus corax) er staðfugl á Íslandi og þarf því að þreyja þorrann hér yfir kaldasta hluta ársins. Til að komast af yfir vetrartímann leggur hann sér ýmislegt til goggs, aðallega hræ og úrgang sem til fellur, en étur annars allt sem hann kemst í til þess að draga fram lífið. Þá sækja hrafnar oft í byggð í von um að finna eitthvað matarkyns yfir köldustu mánuðina og eru fæðugjafir óneitanlega mikilvægar fyrir hrafna í þéttbýli víða um land.

Varpstofn hrafnsins hér á landi er að jafnaði í kringum tvö þúsund pör og eru vísbendingar um að hröfnum hafi fækkað sérstaklega staðbundið á tveimur svæðum, það er á Norðausturlandi og við Breiðafjörð. Margt bendir til að veiðiálag hafi stuðlað að fækkun hrafna á þessum svæðum.

Allir villtir fuglar á Íslandi og í efnahagslögsögu landsins eru friðaðir samkvæmt lögum nr. 64/1994 og á það sama við um villt landspendýr. Nánar má lesa um það í svari við spurningunni Eru allir máfar friðaðir? Lögin heimila þó ráðherra að setja reglugerð til að aflétta friðun nokkurra fuglategunda og er hrafninn þar á meðal. Samkvæmt reglugerð 456/1994 er heimilt er að veiða hrafna allt árið og ekki eru neinar hömlur á því hversu marga fugla má veiða.

Veiðar á villtum dýrum ber að tilkynna til Umhverfisstofnunar. Á vef Hagstofu Íslands er hægt að nálgast tölur um dýra- og fuglaveiðar á hverju ári, þar með talið veiðar á hröfnum. Í gögnunum kemur fram að veiðar á hröfnum hafa dregist saman á undanförnum tæpum þremur áratugum eða úr 7.119 fuglum árið 1995 í 2.589 fugla 2021. Hvort þetta sé til marks um minnkandi stofnstærð, vanskráningu á veiðitölum eða minnkandi veiðiálag á íslenska varpstofninn verður látið liggja milli hluta hér.

Heimildir og mynd:

• Guðmundur A. Guðmundsson og Kristinn Haukur Skarphéðinsson. (2012). Vöktun íslenskra fuglastofna. Forgangsröðun tegunda og tillögur að vöktun. Náttúrufræðistofnun Íslands, NÍ-12010. (Sótt 24.4.2023).
• Kristinn Haukur Skarphéðinsson. (2018). Hrafn (Corvus corax). Náttúrufræðistofnun Íslands. (Sótt 16.02.2021).
• Hagstofa Íslands. Dýra- og fuglaveiðar eftir tegundum 1995-2021. (Sótt 24.4.2023).
• 64/1994: Lög um vernd, friðun og veiðar á villtum fuglum og villtum spendýrum | Lög | Alþingi. (Sótt 24.4.2023).
• Reglugerð nr. 456/1994 um fuglaveiðar og nýtingu hlunninda af villtum fuglum. (Sótt 24.4.2023).
• Mynd: Raven.JPG - Wikimedia Commons. . Birt undir Creative Commons Attribution-ShareAlike 3.0 Unported leyfi. (Sótt 24.4.2023).

...