Flett upp í svörum Vísindavefsins um 300.000 sinnum í mánuði árið 2022

Nafn þitt

Netfang þitt

Netfang móttakanda

Ruslpóstvörn =

Svar

Flett upp í svörum Vísindavefsins um 300.000 sinnum í mánuði árið 2022
Gestir Vísindavefs Háskóla Íslands flettu að meðaltali 300 þúsund sinnum í svörum vefsins í hverjum mánuði árið 2022. Alls voru flettingar ársins rúmlega 3,3 milljónir og heimsóknir um 2,6 milljónir. Það samsvarar um 214 þúsund gestum mánaðarlega.

Þessar tölur jafngilda því að í hverri viku hafi um 50 þúsund gestir heimsótt Vísindavefinn. Í aðsóknarmestu vikunum voru heimsóknirnar rétt um 70 þúsund en þegar nemendur og þorri landsmanna fer í sumar- og jólafrí dregst notkunin að öllu jöfnu saman.

Ef sömu tölur eru heimfærðar upp á daga sést að rúmlega 7.000 gestir nýta sér Vísindavefinn að meðaltali daglega og fletta þar rúmlega 9.000 síðum.

Aðsókn á Vísindavefinn hefur verið býsna stöðug og jöfn undanfarin ár. Þó má geta þess að Vísindavefurinn fann vel fyrir aukinni umferð í heimsfaraldri COVID-19. Á þeim tíma var leitast við að sinna sérstaklega vísindamiðlun á mannamáli um flókin nútímavísindi sem tengdust faraldrinum. Ljóst er að fjölmiðlar og allur almenningur nýtti sér svör Vísindavefsins til að afla sér þekkingar á faraldrinum og til þess að skilja betur hvaða upplýsingar skiptu máli og hverjar ekki. Vinnuhópur þjóðaröryggisráðs um upplýsingaóreiðu og COVID-19 leitaði meðal annars sérstaklega eftir samstarfi við Vísindavefinn í þessu skyni, eins og hægt er að lesa um hér: Þjóðaröryggisráð og Vísindavefur í samstarf.

Eldgos í Geldingadölum og jarðskjálftavirkni áður en gosið hófst hafði einnig markverð áhrif á umferð um Vísindavefinn árið 2021, samanber til að mynda þessa frétt á Vísindavefnum áður en gosið hófst: Skjálftamælar Vísindavefsins í góðu lagi!

Að lokum má nefna að yfirleitt dreifist lestur notenda Vísindavefsins á fjölmörg svör hvern einasta dag ársins. Eins og gefur að skilja eru sum svör þó meira lesin en önnur. Þannig er hægt greina að einhverju leyti hvers konar fróðleik flestir lesendur sækjast eftir hverju sinni. Hér fyrir neðan er til gamans birtur listi yfir fimm mestu lesnu svör ársins 2022:

• Hversu fljótt geta þeir sem fá COVID-19 farið að smita aðra og hvenær eru þeir mest smitandi?
• Hvað er kollagen og í hvað er það mest notað?
• Hvað þýðir ólígarkí og hverjir eru ólígarkar?
• Hafa bóluefni eða ómíkron áhrif á það hvenær þeir sem eru með COVID-19 geta smitað aðra?
• Hvað er átt við með orðinu gaslýsing?

Vísindavefurinn þakkar spyrjendum, lesendum og höfundum sínum fyrir einstaklega góðar móttökur árið 2022.

Heimild og myndir:

• Tölur og myndir um aðsókn og heimsóknir á Vísindavefinn koma frá vefmælingu Matomo. Aðilar eins og NASA, Amnesty International og Sameinuðu þjóðirnar styðjast einnig við sömu vefmælingu.

...