Hvað er slyðra og hvernig er hægt að reka af sér slyðruorðið?

Nafn þitt

Netfang þitt

Netfang móttakanda

Ruslpóstvörn =

Svar

Hvað er slyðra og hvernig er hægt að reka af sér slyðruorðið?
Upprunalega hljóðaði spurningin svona:

Hver er þessi slyðra og hvað er svo svakalega slæmt við þetta fyrirbæri að menn þurfa beinlínis að reka af sér orðið eitt & sér?

Nafnorðið slyðra hefur fleiri en eina merkingu: ‘lint, úr sér vaxið gras; lingerð manneskja eða skepna; leti, ómennska, linka; ósigur, ófarir; kjarkleysa, bleyðimennska’. Elsta dæmið í Ritmálssafni Orðabókar Háskólans er í Ritum þess Islendska Lærdóms-Lista Felags (VIII:197) frá síðari hluta 18. aldar og sýnir fyrstu merkinguna í upptalningunni hér á undan:

Í kríngum tradir, vid þiódbrautir og bæi, vex at sønnu gras mikit; en fáum sképnum finnz til sliðru, á medan hún er græn.

Dæmi úr Skírni frá 1875 sýnir merkinguna ‘kjarkleysi, bleyðimennska’ og er nálægt því sem spurt var um:

að reka af sjer alla slyðru og sýna meiri hlutanum í hinni þingdeildinni, að.

Elsta heimild um orðasambandið að reka af sér slyðruorðið er enn eldra og kemur fyrir í málshátta- og orðasambandasafni Jóns Rúgmanns sem hann safnaði til á miðri 17. öld:

Ad reka Af sier slidru ordid.

Orðasambandið merkir að sýna í verki að maður er ekki duglaus þótt einhverjir haldi því ef til vill fram.

Heimild og mynd:

• Ritmálssafn Orðabókar Háskólans. Stofnun Árna Magnússonar í íslenskum fræðum. http://ritmalssafn.arnastofnun.is
• Trevor Harris. (2014, 24. júní). Sea wall path by Lawling Creek. Geograph. Birt undir CC BY-SA 2.0 leyfi. https://www.geograph.org.uk/photo/4042024

...