Hvenær var stafurinn y tekinn upp á Íslandi?

Svar

Stafurinn y hefur verið ritaður hérlendis allt frá elstu textum. Í upphafi var y kringt, bæði langt og stutt og borið fram eins og y í dönsku. Á síðari hluta 15. aldar hófst sú breyting að stutt og langt y afkringdist og féll í framburði saman við i og í.

Sama gerðist með tvíhljóðið ey. Það afkringdist og féll saman við ei í framburði. Þessar breytingar voru um garð gengnar á 17. öld. Þótt þetta samfall hafi orðið hafa y, ý og ey þó haldið stöðu sinni í rithætti orða.

Hin svonefnda „fyrsta málfræðiritgerð" stendur fremst af fjórum málfræðiritgerðum sem varðveittar eru í Ormsbók Snorra-Eddu (Codex Wormianus, AM 242 fol.). Handritið er frá þriðja fjórðungi 14. aldar en fyrsta málfræðiritgerðin er frá miðri 12. öld. Í henni er stafurinn y tiltekinn sem einn af stöfum í stafrófi.

Mynd og frekara lesefni:

• Snorri Sturluson's Edda, AM 242 fol., Codex Worminanus - Communication and Information Sector's Photobank. (Sótt 27.04.2012).
• Fyrsta Málfræðiritgerðin. (Skoðað 27.04.2012).