![](../myndir/muhammadali_081010.jpg)
Boxarinn heimsfrægi Cassius Clay tók upp nafnið Muhammad Ali þegar hann gerðist múslími.
Á vefnum Wikipedia er að finna lista yfir algengustu mannanöfn í nokkrum löndum og á afmörkuðum svæðum heims. Takmarkaður fjöldi landa á þessum lista helgast sjálfsagt af því að upplýsingar af þessu tagi eru sjaldnast eins aðgengilegar og til dæmis hér á landi þar sem Hagstofa Íslands heldur utan um þessa tölfræði. Á síðunni Behind the Name má einnig nálgast lista yfir algeng nöfn í völdum löndum, aðallega í Evrópu. Rétt er að taka fram að hér er oftast um að ræða þau nöfn sem vinsælast hefur verið að gefa börnum á síðustu árum, en það þurfa alls ekki að vera algengustu nöfnin þegar litið er á þjóðina í heild. Sem dæmi má nefna að vinsælustu nöfn á drengjum sem fæddust á Íslandi árið 2009, voru Alexander, Daníel og Jón og á stúlkum Anna, Rakel og Emilía/Emelía. Hins vegar eru Jón, Sigurður og Guðmundur algengustu karlmannsnöfnin og Guðrún, Anna og Sigríður algengustu kvenmannsnöfnin. Það getur verið fróðlegt að skoða hvaða nöfn eru vinsæl í hinum ýmsu heimshlutum og hafa þá tungumál, menningu og trúarbrögð í huga. Í múslímaríkjum eru, auk Múhameðs, karlmannsnöfn eins og Ahmed, Hassan, Youssef og Abdul algeng, en af algengum kvenmannsnöfnum má meðal annars nefna Aya og Fatima. Nokkra samsvörun má sjá í vinsælustu nöfnunum í Ástralíu, Nýja-Sjálandi og Bretlandi en þar eru Jack, William, Oliver, Thomas, James og Joshua meðal algengustu karlmannsnafna en Emily, Olivia, Ruby, Amelia og Chloe dæmi um vinsæl kvenmannsnöfn. Í Bandaríkjunum voru vinsælustu strákanöfnin árið 2009 Jacob, Ethan, Michael, Alexander og William en Isabella, Emma, Olivia, Sophia og Ava vinsælustu stúlkunöfnin. Í efstu tíu sætunum voru fleiri nöfn sem einnig eru vinsæl í öðrum enskumælandi löndunum, svo sem Joshua, Daniel, Emily og Chloe.
![](../myndir/tviburar_111010.jpg)
Ef við lítum okkur nær og horfum til Norðurlandanna, nánar tiltekið Danmerkur, Noregs og Svíþjóðar, má sjá að karlmannsnafnið Lucas og kvenmannsnafnið Emma eru mjög vinsæl í öllum þessum löndum nú um stundir. Í Noregi var algengast árið 2009 að gefa drengjum nöfnin Lucas, Emil, Alexander, Oliver og Mathias og stúlkum nöfnin Emma, Linnea, Nora, Sofie og Sara. Í Svíþjóð voru flestir strákar fæddir 2009 skírðir Lucas, Elias, Oscar, William og Hugo en algengustu stúlkunöfnin voru Alice, Maja, Ella, Emma og Elsa. Í Danmörku voru það svo nöfnin Mikkael, Lucas, William, Emil og Noah sem flestir drengir fengu árið 2009 og Freja, Ida, Emma, Lærka og Caroline meðal stúlkna. Frekari fróðleikur á Vísindavefnum:
- Hvað hét Múhameð spámaður fullu nafni? eftir Jón Gunnar Þorsteinsson
- Af hverju þurfa menn að heita eitthvað? Af hverju ekki bara þú, hún eða hann? eftir Erlendur Jónsson
- Eru til menningarheimar þar sem fólk er nafnlaust? eftir Guðrúnu Kvaran
- Hvað eru til mörg nöfn á Íslandi? eftir Guðrúnu Kvaran
- Hver eru 10 sjaldgæfustu nöfnin á Íslandi? eftir Guðrúnu Kvaran
- Eru til einhver séríslensk mannanöfn? eftir Guðrúnu Kvaran
- List of most popular given names á Wikipedia. Skoðað 8. 10. 2010.
- Mohammed is most popular name for baby boys in London á Telegraph.co.uk. Skoðað 8. 10. 2010.
- Popular Baby Names á Social Security Online. Skoðað 8. 10. 2010.
- Namnestatistikk, 2009 á Statistisk sentralbyrå. Skoðað 8. 10. 2010.
- Mest populære navne for danskere født i et bestemt år á Danmarks statistik. Skoðað 8. 10. 2010.
- Alice och Lucas populäraste namnen 2009 á Statistiska centralbyrån. Skoðað 8. 10. 2010.
- Hve margir heita? á Hagstofa Íslands. Skoðað 8. 10. 2010.
- Mynd af Muhmmad Ali: Muhammad Ali, The Champ: previously unseen photographs á Telegraph.co.uk. Sótt 8. 10. 2010.
- Mynd af tvíburum: Meet the Multiples: Photo Gallery of Twins and Multiples á About.com. Sótt 11. 10. 2010.