Sendu inn spurningu

Hér getur þú sent okkur nýjar spurningar um vísindaleg efni.

Hafðu spurninguna stutta og hnitmiðaða og sendu aðeins eina í einu. Einlægar og vandaðar spurningar um mikilvæg efni eru líklegastar til að kalla fram vönduð og greið svör. Ekki er víst að tími vinnist til að svara öllum spurningum.

Persónulegar upplýsingar um spyrjendur eru eingöngu notaðar í starfsemi vefsins, til dæmis til að svör verði við hæfi spyrjenda. Spurningum er ekki sinnt ef spyrjandi villir á sér heimildir eða segir ekki nægileg deili á sér.

Spurningum sem eru ekki á verksviði vefsins er eytt.

Að öðru leyti er hægt að spyrja Vísindavefinn um allt milli himins og jarðar!

=

Er bannað með lögum að hjóla ölvaður?

Samkvæmt umferðarlögum er bannað að hjóla á reiðhjóli ölvaður ef ástand viðkomandi er með þeim hætti að hann getur ekki stjórnað hjólinu örugglega. Í 6. mgr. 45. gr. umferðarlaga nr. 50/1987 er svohljóðandi ákvæði:
Enginn má hjóla eða reyna að hjóla eða stjórna eða reyna að stjórna hesti, ef hann er undir svo miklum áhrifum áfengis eða annarra örvandi eða deyfandi efna, að hann geti eigi stjórnað hjólinu eða hestinum örugglega.

Sambærilegt ákvæði er í 3. mgr. 45. gr. a sem lýtur að ávana- og fíkniefnum en þar segir:
Enginn má hjóla eða reyna að hjóla eða stjórna eða reyna að stjórna hesti ef hann er undir áhrifum ávana- og fíkniefna skv. 1. mgr.

Í 1. mgr. 45. gr. a, sem þarna er vísað til, kemur fram að enginn megi stjórna eða reyna að stjórna vélknúnu ökutæki ef hann er undir áhrifum ávana- og fíkniefna sem bönnuð eru á íslensku yfirráðasvæði samkvæmt lögum um ávana- og fíkniefni og reglugerðum settum samkvæmt þeim.

Samkvæmt umferðarlögum er bannað að hjóla á reiðhjóli ölvaður ef ástand viðkomandi er með þeim hætti að hann getur ekki stjórnað hjólinu örugglega.

Reiðhjól er skilgreint með sérstökum hætti í umferðarlögum. Þar undir falla í fyrsta lagi það sem mætti kalla hefðbundin reiðhjól það er ökutæki sem knúin eru áfram með stig- eða sveifarbúnaði. Í öðru lagi geta vélknúnir hjólastólar fallið þar undir ef þeir eru ekki hannaðir til hraðari aksturs en 15 km á klst. Í þriðja lagi geta lítil vél- og rafknúin ökutæki talist reiðhjól ef þau eru hönnuð til aksturs á hraða frá 8 km og upp í 25 km á klst. Undir þessa skilgreiningu fellur meðal annars vélknúið hlaupahjól að ákveðnum skilyrðum uppfylltum.

Hafa verður í huga að umferðarlögin gilda almennt um umferð á vegum en geta þó, eftir því sem við á, átt við um umferð ökutækja annarsstaðar. Af því leiðir að það fer eftir aðstæðum hverju sinni hvort og hvenær lögreglan telur ástæðu til að hafa afskipti af hjólreiðamönnum ef grunur leikur á að þeir séu undir áhrifum áfengis. Því verður að telja líklegra að til afskipta lögreglu komi ef ölvaður hjólreiðamaður er talinn valda hættu við mikla umferðargötu en ef hann ákveður að hjóla hring á túninu heima hjá sér.

Brot gegn þeim ákvæðum umferðarlaga sem hér hafa verið nefnd geta varðað sektum. Sú fjárhæð er nú 5.000 kr., sbr. 100. gr. umferðarlaga og reglugerð nr. 930/2006.

Heimildir:
  • Umferðarlög nr. 50/1987.
  • Reglugerð nr. 930/2006 um sektir og önnur viðurlög vegna brota á umferðarlögum og reglum settum samkvæmt þeim.

Mynd:

Útgáfudagur

9.10.2013

Spyrjandi

Kristján Helgi Olsen Ævarsson

Höfundur

lögfræðingur

Tilvísun

Maren Albertsdóttir. „Er bannað með lögum að hjóla ölvaður? “ Vísindavefurinn, 9. október 2013. Sótt 25. júlí 2017. http://visindavefur.is/svar.php?id=61328.

Maren Albertsdóttir. (2013, 9. október). Er bannað með lögum að hjóla ölvaður? Vísindavefurinn. Sótt af http://visindavefur.is/svar.php?id=61328

Maren Albertsdóttir. „Er bannað með lögum að hjóla ölvaður? “ Vísindavefurinn. 9. okt. 2013. Vefsíða. 25. júl. 2017. <http://visindavefur.is/svar.php?id=61328>.

Chicago | APA | MLA

Sendu inn spurningu
eða

Vísindadagatalið

Vaxlitur

Vaxmálun á sér sér langa sögu, Fornegyptar, Grikkir og Rómverjar blönduðu t.d. litum í bráðið vax. Á fullgerðum myndum voru pensil- eða spaðaför sléttuð með hita. Rómverski höfundurinn Plinius eldri lýsir aðferð til vaxmálunar í alfræðiriti sínu frá 1. öld e.Kr. Vaxlitir handa börnum voru fyrst gerðir snemma á 20. öld.