Hvað er útselskópur?

Nafn þitt

Netfang þitt

Netfang móttakanda

Ruslpóstvörn =

Svar

Hvað er útselskópur?
Útselskópur er afkvæmi útsels (Halichoerus grypus) en svo nefnist önnur tveggja selategunda sem kæpa hér á landi. Hin tegundin er landselur (Phoca vitulina). Útselir eru stórar skepnur. Brimlarnir geta orðið allt að 300 kg að þyngd og 3 metrar á lengd en urturnar verða mest um 180 kg að þyngd.

Kópar útselsins fæðast að hausti eða frá september til nóvember og eru þá kallaðir á nokkrum stöðum hér á landi læpur. Þeir fæðast með hvít fósturhár sem þeir missa á þriðju til fjórðu viku og kemur þá grár feldurinn í ljós. Við fæðingu eru útselskópar um 80 cm langir og vega að jafnaði í kringum 12 kg.

Kópurinn er á spena í um tvær vikur eftir kæpingu. Mjólk urtunnar er mjög fiturík og þyngist kópurinn um 1,5 kg á dag. Þegar kópurinn hefur verið vaninn af spena heldur hann um sinn til í sellátrinu og lifir á fitubirgðum sínum, en þegar þær þverra leitar hann til sjávar og erfið lífsbaráttan tekur við þar sem reynir á hans eigin færni til sjálfsbjargar.

Hér við land eru nokkur stór sellátur útsela og önnur sem eru í vexti. Dæmi um nýlega „stofnað“ sellátur útsels er í Surtsey.

Hægt er að lesa meira um seli á vef Selaseturs Íslands.

Mynd:

• Tree of Life Web Project. Höfundur myndar: Wayne. Birt undir Creative Commons Attribution-NonCommercial License - Version 2.0. Sótt 21.3.2012.

...